Анам есіме түсті . Курьер пакетті үнсіз жеткізуден бас тартып, Алматыда зейнеткерді құтқарып қалды

Алматыда курьер қарт әйелге қатысты алаяқтықтың алдын алуға көмектесіп, оның жинаған ақшасын сақтап қалды. Қырағылығы мен азаматтық жауапкершілігі үшін жігітті полиция марапатталды, деп хабарлайды Tengri Life.

Полиция мәліметінше, тапсырысты жеткізу кезінде Нартай Есімханов зейнеткердің қатты қобалжып, сәлемдеменің ішінде не бары туралы сұрақтан жалтарғанын байқаған. Күдіктенген ол бірден бұл туралы полицияға хабарлаған.

Белгілі болғандай, әйел телефон алаяқтарының құрбаны болған. Олардың нұсқауымен ол курьерге ішінде 3 мың доллар (1,4 миллион теңгеден аса) салынған пакетті берген.

Курьердің дер кезінде хабарлауының арқасында қылмыстың алды алынып, барлық ақша зейнеткерге қайтарылды.

Көрсеткен азаматтық жауапкершілігі үшін Нартай Есімхановқа алғыс хат пен естелік сыйлық табысталды.

Курьердің өзі бұл жағдайда бейжай қала алмағанын айтты.

"Әжейдің көзіне қараған сәтте оның қатты қорқып тұрғанын түсіндім. Оны шын жүректен аядым. Сол кезде өз анам есіме түсіп, "егер оның орнында менің анам болса ше?" деген ой келді. Сондықтан бірден полицияға хабарластым. Дұрыс шешім қабылдадым деп есептеймін", - деді Нартай Есімханов.

Google News арқылы жаңалықтарымызды қадағалаңыз