Ақмола облысында қуаттылығы жылына 30 мың бас мал болатын ет консорциумы құрылмақ

Ақмола облысының Ерейментау ауданында ірі агроөнеркәсіптік ет кластерін құру бойынша ауқымды инвестициялық жоба іске қосылды.

Жалпы инвестиция көлемі – 15,5 млрд теңге. Жобаны жүзеге асыру өңірдегі етті мал шаруашылығын дамытудағы маңызды кезеңдердің бірі және экспортқа бағытталған өндірісті қалыптастыруға берік негіз жасайды.

Жоба аясында асыл тұқымды мал шаруашылығы, фермерлік шаруашылықтар және ірі қара малды өнеркәсіптік бордақылау барлығы бір консорциумға біріктіріледі. Осылайша, асыл тұқымды малды көбейтуден бастап, бордақылау және ет өнімін өткізуге дейінгі толық өндірістік кезең қалыптаспақ.

Құрылатын кластердің құрамына қалмақ тұқымды ірі қараның тұқымдық репродукторлары – «Торғай» және «Соколинки и К» серіктестері, сонымен қатар заманауи бордақылауға арналған кешен – «Nomad» серіктестігі кірді.

2027 жылға қарай жоба қатысушылары жылына 30 мың бас ірі қараға есептелген өндіріс қуатты қамтуды жоспарлап отыр. Сондай-ақ, жайылымдық жерлердің жемдік құнарлылығын ұлғайту да маңызды бағыттардың бірі, бұл мал шаруашылығының тұрақтылығы мен тиімділігін арттыруға ықпал етеді.

Орта мерзімде консорциумның мақсаты — етті ірі қараның ұрғашы малын 17,3 мың басқа дейін көбейту, асыл тұқымды жас мал өндірісін арттыру және өңір фермерлерімен кооперацияны дамыту. Жоба шағын және орта агробизнестің қатысуына жол ашады, оларға тұрақты нарық пен тұқымдық ресурстарға қолжетімділікті қамтамасыз етеді.

Бүгін, 15:14