Ақмола облысындағы жантүршігерлік жол апаты: 10 жастағы қыз қаза тауып, үш жасар бүлдіршін ауыр жараланды

Ақмола облысында адам өліміне әкелген жантүршігерлік жол-көлік оқиғасы болды. Қайғылы апат Щучинск–Степняк тасжолының 16-шақырымында, Бурабай ауданына қарасты Вишневка ауылының маңында болған, - деп хабарлайды Aikyn.kz порталының тілшісі.

Алдын ала мәлімет бойынша, күрежолдың бойында Nissan Almera мен Chevrolet Niva автокөліктері соқтығысқан. Соққының қатты болғаны соншалық, көліктердің бірі жол жиегіндегі кюветке ұшып кетіп, бірнеше рет аударылған. Апат салдарынан төрт адам зардап шекті. Олардың екеуі – балалар. Үш жасар бүлдіршін басынан және денесінің әр жерінен жарақат алып, медициналық мекемеге жеткізілген. Ал 2016 жылы туған, небәрі 10 жастағы қыз бала алған ауыр жарақаттарынан оқиға орнында бірден көз жұмды. Сонымен қатар зардап шеккендердің қатарында екі әйел де бар. Олар түрлі дене жарақаттарымен ауруханаға жеткізілген.

Оқиғаға байланысты Ақмола облысы Полиция департаменті ресми түсініктеме берді.

2026 жылғы 21 шілдеде Щучинск–Степняк автожолының 16-шақырымында Nissan Almera және Chevrolet Niva автокөліктерінің қатысуымен жол-көлік оқиғасы болды. Жол апаты салдарынан Nissan Almera көлігінің 2016 жылы туған кәмелетке толмаған жолаушы оқиға орнында қайтыс болды. Осы автокөліктің тағы үш жолаушысы түрлі дене жарақаттарымен медициналық мекемеге жеткізілді. Қазіргі уақытта аталған факті бойынша сотқа дейінгі тергеп-тексеру жүргізіліп жатыр. Оның қорытындысы бойынша, тиісті процессуалдық шешім қабылданады», – дейді Ақмола облысы Полиция департаментінің баспасөз қызметінен. 

Полиция жүргізушілерді жол қозғалысы ережелерін қатаң сақтауға, белгіленген жылдамдық режимін бұзбауға және жолда барынша мұқият болуға шақырды.

Абзал АЛПЫСБАЙҰЛЫ, Ақмола облысы

Сараптама, зерттеу мақала, күнделікті өзекті ақпаратты «Айқынның»   TELEGRAM арнасынан табасыз.