Ақмола облысындағы жол көлік оқиғасы: апаттан кейінгі әйелді құтқару оқиғасы

Галина Федоренконың отбасы үшін демалыстан қайтар жол қасіретке айналды. Ақмола облысында болған сұмдық жол апатынан Галиның екі жақыны қаза тауып, әйелдің өзі ауыр жарақат алды. Оқиға 10 тамызда болған еді - арада бір айға жуық уақыт өткенде, тек 8 қыркүйекте ғана ол үйіне шығарылды. Әйелдің аман қалу тарихын Tengri Health баяндайды.

Үйге жеті шақырым қалғандағы қасірет: не болды?

Редакцияға Галина Федоренконың келіні Юлия хабарласып, жақындарының өмірі үшін күрескен дәрігерлерге алғыс айтқысы келетінін жеткізді.

Юлияның айтуынша, ол және оның туыстары Астанадан жүз шақырым жердегі Ақкөл қаласында тұрады. Жазда қайын енесіне Германияда тұратын туған сіңлісі күйеуімен бірге қонаққа келген. Үлкен отбасы болып демалысқа шыққан. Олар Астана арқылы пойызбен келіп, одан әрі Ақкөлге дейін минивэнмен жетуі керек болған.

"Көлікте 10 адам болды. Ақкөлге небәрі жеті шақырым қалғанда, шағын автобус ірі жол апатына ұшырады. Апаттан қайын енемнің туған сіңлісі мен оның жұбайы - Германия азаматтары қаза тапты", - дейді Юлия.

Олардың қасында он жасар қызы болған: қыз бала ғажаптың күшімен сынықтардан аман қалды, тек тізесі соғылып, тістері шытынаған.

Отбасының басқа мүшелері көптеген жарақат пен сынық алды. Ең ауыр жараланған 60 жастағы Галина Федоренко болды, ол бәрінен де ұзақ емделді.

"Екі қолы да тура мағынасында быт-шыт болған еді"

Әйелге ауыр политравма диагнозы қойылды: оның 14 қабырғасы мен үш омыртқасы сынған. Бірақ ең қатты зақымдалған - қолдары.

"Екі қолы да тура мағынасында быт-шыт болған еді - қайта қалпына келмейтіндей көрінді", - деп еске алады Юлия Федоренко.

Апаттан кейін бірден зардап шегуші Ақкөл ауруханасына жеткізілді. Онда Галина Федоренко он күн жатты. Дәрігерлер отаға бірден кірісе алмады: әйелдің сатурациясы, яғни қанның оттегімен қанығу деңгейі тым төмен болған.

Рентгеннен кейін оның қолдары гипспен бекітіліп, демеуші терапия басталды.

"Басында қайын енемнің жағдайы өте ауыр болды, бірақ қандағы оттегі көрсеткіштері жақсарған кезде оны Астанаға, академик Нұрлан Батпенов атындағы Ұлттық травматология және ортопедия ғылыми орталығына ауыстырды", - дейді Юлия.

Галина Федоренконың апаттан кейінгі білегінің рентгені. Фото: Юлия Федоренко

Ота қалай өтті?

Галина Федоренконы емдеуге екінші травматология бөлімшесінің мамандары кірісті: бөлім меңгерушісі - Александр Степанов, емдеуші дәрігер Ержан Касабаев және анестезиолог Павел Останен.

Юлияның сөзінше, дәрігерлер 4,5 сағатқа созылған күрделі ота жасаған.

"Олар нағыз хирургиялық шеберлік пен зор төзімділік танытып, оның жағдайын тұрақтандыра алды және екі қолын да қайта жинап шықты - қазір қолдары түп-түзу".

Емдеудің түпкілікті нәтижесі сәл кейінірек белгілі болады: екі айдан кейін Галина Федоренко қайтадан КТ және басқа да тексерулерден өтіп, содан кейін оңалтуды бастайды. Қазірше екі қолы да гипсте. Дегенмен, 8 қыркүйек күні, бір айға жуық емнен кейін әйел ауруханадан үйіне шығарылды.

"Қазір жағдайы қанағаттанарлық, бірақ әлі де өзгенің көмегінсіз жүре алмайды. Сондықтан жолдасым екеуміз оны және қайын атамды өз үйімізге алып кетеміз, оларға күтім жасаймыз", - дейді Юлия.

"Нағыз дәрігерлер осындай болады!"

Әңгіме соңында Юлия Галина Федоренкоға ота жасап қана қоймай, оған дейін және одан кейін де көмектесіп, отбасына моральдық қолдау көрсеткен медицина қызметкерлері туралы тағы бір мәрте айтып өтті:

"Біз "қолы алтын" нағыз білікті дәрігерлерге шексіз, шын жүректен алғыс айтқымыз келеді. Олар ота үстелінде жоғары кәсібилік танытып, өміріміздің ең қиын кезеңінде зор адами қолдау көрсету арқылы нағыз ғажайып жасады. Дәрігерлер қандай десеңізші! Мұндай жылы қарым-қатынасты мен еш жерден көрген емеспін".

Дәрігерлердің болжамы бойынша, Галинаның толық сауығуына бес айдай уақыт кетуі мүмкін.

Google News арқылы жаңалықтарымызды қадағалаңыз

Жазылу

жол апаты

Астана

дәрігер

дәрігерлер

науқастар