АҚШ Парсы шығанағында Иранның дрон тасымалдаушы кемесін жойды

Ислам революциясы сақшылар корпусының Әуе теңіз күштерінің кемесі қайта жабдықталған контейнер тасымалдаушы болған және әуелде соққы беретін ұшқышсыз аппараттарды орналастыруға арналған әлемдегі алғашқы кеме саналған. Дрондардан бөлек, ол тікұшақтар, зымырандар және шағын катерлер алып жүре алған.

Die Welt басылымының хабарлауынша, Shahid Bahman Bagheri Екінші дүниежүзілік соғыстан бері суға батырылған ең ірі әскери кеме. АҚШ Қарулы күштері қолбасшылығының мәліметінше, кеме операция басталғаннан кейін көп ұзамай, яғни 28 ақпан күні Парсы шығанағында жойылған. Оның су ығыстырылымы шамамен 42 мың тоннаны құраған.

Салыстыру үшін, 1941 жылы суға батырылған немістің Bismarck линкорының су ығыстырылымы 50 мың тоннадан асқан, ал 2022 жылдың сәуірінде Қара теңізде батқан Moskva зымыран крейсерінікі — шамамен 11,5 мың тонна.

Айта кетейік, кеме екі жылда жасалған. Алғашқы сынаққа ол 2024 жылдың қараша айының соңында Бендер-Аббас тіркеу портынан шыққан. Ресми түрде қолданысқа 2025 жылғы 6 ақпанда енгізілген.

Дрон тасымалдаушы теңіз толқыны 9 балл болғанға дейін әрекет ете алады және жүріс қашықтығы 22 мың теңіз миліне дейін жетеді. Бұл оған жанармай құймай және порттарға кірмей ұзақ уақыт алыс сапарда болуға мүмкіндік береді. Бортында ұшқышсыз аппараттарға арналған ұзындығы 180 метрлік ұшу-қону жолағы бар.

Кемеде сегіз «Нур» кемеге қарсы зымыраны, сегіз Kowsar-222 зениттік зымыраны, 30 мм автоматты артиллериялық қондырғы, сондай-ақ 20 мм зеңбіректер бар. Олардың ішінде, кей деректер бойынша, «Гатлинг» типті қондырғылар мен қашықтан басқарылатын турельдер бар.

Осы уақытта Иран Ормуз бұғазының толық бақылауда екенін мәлімдеді. Бұл мұнай мен газ экспорты үшін стратегиялық маңызды бағыт. Ел әуе теңіз күштері өкілі Мохаммад Акбарзаде бұл аймақ арқылы өтетін кез келген кеме Иран зымырандары мен дрондарының нысанына айналуы мүмкін екенін ескертті.

Бұған дейін АҚШ президенті Дональд Трамп бұғаз арқылы өткен кезде мұнай танкерлерін қорғауға америкалық әуе теңіз күштері дайын екенін мәлімдеген. Өз кезегінде АҚШ армиясы қақтығыс басталғалы бері 17 иран кемесі, соның ішінде бір сүңгуір қайық жойылғанын хабарлады.

Еске салайық, Ормуз бұғазы әлемдегі негізгі мұнай бағыттарының бірі. Ол арқылы күн сайын шамамен 20–21 млн баррель мұнай мен мұнай өнімдері тасымалданады. Бұл теңіз арқылы тасымалданатын жеткізілімдердің шамамен 20%-ы.

Сондай-ақ ол алюминий, қант және тыңайтқыш сияқты басқа да шикізат түрлері үшін негізгі бағыт саналады.

Бағыттағы кез келген бұзылыс энергия тасымалдаушылар бағасының бірден өсуіне әкеледі: экспорттаушылар үшін бұл табыстың артуы болса, импорттаушылар үшін — инфляция, жанармайдың қымбаттауы және экономика үшін жаңа тәуекелдер.

Ормуз бұғазы жабылды. Енді мұнай нарығын не күтіп тұрғанын мына материалдан оқыңыздар.