Ақтөбе облысында бірқатар заманауи мектеп салынып жатыр

Ақтөбе облысында «Келешек мектептері» ұлттық жобасы аясында 14 мектептің құрылысы жүріп жатыр.  Оқу ордалары 11 400 орынға лайықталған. Қазірдің өзінде жеті су жаңа білім ошағы ел игілігіне берілді. Барлығында заман талабына сай оқытуға мүмкіндік жасалған. Қауіпсіз әрі қолжетімді білім беруге негізделген бастаманың шарапатын әсіресе, ауылдағы ағайын көріп отыр.

Сарыжар ауылында ашылған су жаңа бұл мектеп 300 оқушыға лайықталған. Нысанның құрылысы өткен жазда басталды. Жұмыс жылға жетпей аяқталып, жаңа оқу жылында ел игіліне берілді. Қолжетімді әрі қауіпсіз білім алуға бар жағдай жасалған.

Манас Мақсұтов, мектеп оқушысы:

- Мен 4-сыныпта оқимын. Мектебімізде көптеген мүмкіндіктер бар. Біз цифрлық бөлмесінде компьютерлермен жұмыс жасаймыз. Спорт залымыз кең көптеген ойындар ойнатылады. Сыртта ойын алаңымыз бар.

Сымбат Құламанова, ауыл тұрғыны:

- Осы мектепте, бастауыш сыныпта екі қызым оқиды. Математика сыныбында бір қызым бар. Жаңа жайлы мектептің ашылғанына мен қуаныштымын. Себебі мектеп жаңа технологиялармен жабдықталған. Заманауи стильде, кең әрі жарық.

Қос қабаттан тұратын ғимаратта мектепке дейінгі және бастауыш сыныптар үшін арнайы кабинеттер жасақталды. Химия, физика, биология сынды арнайы пәндік кабинеттер тиісті оқу құралдарымен жабдықталған. Заманауи зертханасы, кітапхана мен асхана, түрлі спорт залдары бар. Тіпті қыста мұз айдыны, жазда футбол алаңымен қамтылады. Білім ошағында барлығы 16 сынып кешені жасақталған.

Айгүл Омарова, №3 Сарыжар орта мектебінің директоры:

- Мектеп материалдық-техникалық базамен толық жабдықталған. Бұл оқушыларға үлкен мүмкіндіктер береді. Педагогтердің толық жұмыс орындарының жабдықталуы, мектептегі кітапхана қоры оқушыларды шығармашылық дамытып, жеке ерекшеліктері бойынша жұмыс істеуге мүмкіндіктер береді.

«Келешек мектептері» ұлттық жобасы аясында облыста 14 мектеп салу жоспарланған. Оның екеуі көктемде пайдалануға берілді. Білім күнінде бесеуі ашылды. Жыл соңына дейін жеті білім ошағының құрылысы аяқталады. 

Авторы: Кәмшат Мұхамеджан