Археологияға арналған ақпараттық жүйе құрылады

Археологиялық жұмыстар жөніндегі бірыңғай автоматтандырылған ақпараттық жүйе құрылады.

Мәжіліс тарихи-мәдени мұра объектілерін қорғау мәселелері бойынша заң жобасын бірінші оқылымда мақұлдады. Ақпараттық жүйеде археологиялық жұмыстар барысында анықталған тарихи-мәдени мұра объектілері туралы барлық мәліметтер жинақталады. Бұл салаға бақылауды күшейтеді дейді депутаттар. Бұдан бөлек ғылыми-реставрациялық және археологиялық жұмыстарға екі бөлек лицензия беру ұсынылды. Енді лицензиялардың нақты мерзімі болады. Бұдан бөлек тарихи және мәдени жәдігерлерді зерттеу кезінде техникалық жабдықтарды заңсыз пайдалануға тыйым салынады.

Асхат Аймағамбетов, ҚР Парламенті Мәжілісінің депутаты:

- Мысалы, бізде археологиялық қазбаны жүргізеді. Қазбаны жүргізгеннен кейінгі есебі қайда? Оны кім, қай жерде, нені қазып жатыр? Нені тапты? Ол ғылыми әдістемеге сәйкес пе? Ешкім оны білмейді. Тіпті қазбаны өткізгеннен кейін оның есебі де тапсырылмайды. Сондықтан бізде деректер хауысы бар. Міне, осыны реттеу үшін біз енді бірыңғай цифрлық жүйені енгізіп жатырмыз.

Тарихи жәдігерлердің ұлттық қоры болады

Қазақстанның барлық аумағынан жиналған жәдігерлерді сақтау үшін Археологиялық олжалар мен материалдардың ұлттық депозитарийі құрылады. Депутат Асхат Аймағамбетовтың айтуынша, әр ғалымға оның қолжетімділігі қамтамасыз етіледі. Сондай-ақ құжатта археологиялық жұмыстар нәтижесінде бұзылған жер учаскелері мен басқа да табиғи объектілерді міндетті түрде қалпына келтіру ережелері де нақтыланады. Ал тарихи және мәдени маңызы бар жерлерді мемлекеттік жер кадастрына енгізу ұсынылды.

Асхат Аймағамбетов, ҚР Парламенті Мәжілісінің депутаты:

- Бізде ғылыми тұрғыда үйлестіруші бірде бір ұйым жоқ. Сондықтан бізде Әлкей Марғұлан атындағы Археология институт барлық үйлестіру жұмысын өткізеді. Яғни ол ғылыми-методологиялық сәйкес пе, сәйкес емес пе барлығын осылар анықтап жүргізетін болады.