Қазақстанда археологиялық жұмыстардың бірыңғай ақпараттық жүйесі құрылады

Бүгін Мәжілісте тарихи-мәдени мұра объектілерін сақтау және пайдалану мәселелерін қамтитын заң жобасы қаралып, бірінші оқылымда мақұлданды. Құжат Мемлекет басшысының Ұлттық Құрылтайда берген археологиялық қызметті реттеу жөніндегі тапсырмасын жүзеге асыру мақсатында депутаттардың бастамасымен дайындалған, деп хабарлайды Egemen.kz.

Фото: Ашық дереккөз

«Заң жобасының мақсаты – археология саласындағы тарихи-мәдени мұра нысандарын қорғау және пайдалану мәселелері бойынша заңнаманы жетілдіру. Құжатта археологиялық жұмыстар барысында анықталған тарихи-мәдени мұра объектілері туралы барлық мәліметті жинақтау үшін «Археологиялық жұмыстар жөніндегі бірыңғай автоматтандырылған ақпараттық жүйе» құру қарастырылған», деп хабарлады ҚР Парламенті Мәжілісінің баспасөз қызметі.

Сонымен қатар, археологиялық зерттеулерді ғылыми және ақпараттық тұрғыда қолдау үшін Ә.Х.Марғұлан атындағы Археология институтын үйлестіретін «Ұлттық археологиялық қызметтің» құзыреттерін айқындау ұсынылады.

«Ғылыми-реставрациялық және археологиялық жұмыстарға 5 жылдық мерзімге лицензия беруді бөлу арқылы археологиялық жұмыстарға лицензия беру жүйесіне өзгерістер енгізіледі. Сондай-ақ қаржыландыру тетігін ескере отырып, археологиялық жұмыстар жоспарлы және профилактикалық (жоспардан тыс) болып екіге бөлінеді. Қазақстанның барлық аумағынан жиналған жаппай археологиялық олжалар мен материалдарды сақтау үшін жаппай Археологиялық олжалар мен материалдардың ұлттық депозитарийі құрылады», делінген хабарламада.

Құжатта археологиялық жұмыстар нәтижесінде бұзылған жер учаскелері мен басқа да табиғи объектілерді міндетті түрде қалпына келтіру ережелері нақтыланады. Бұдан бөлек, археологиялық іздестіру кезінде металл детекторлар, радарлар мен магниттік құрылғыларды заңсыз қолдануға тыйым салынады.

Сонымен қатар тарихи және мәдени маңызы бар жерлер мен олардың қорғалатын аймақтары мемлекеттік жер кадастрына енгізілетін болады.