Арменияда экс президент Саргсянның шетелге шығуына қатысты салынған тыйым күшін жойды

Бұрынғы президенттің адвокаты Амрам Макинянның айтуынша, сапарға қойылған шектеулер негізсіз және шамадан тыс. 

– Саяхатқа тыйым салу – Серж Саргсянға тағылған барлық ойдан шығарылған айыптардан да қатаңырақ шара. Бұл шара адамның жеке басын куәландыратын құжатсыз жасырынып, шекараны кесіп өтуі мүмкін жағдайларда қолданылады, - деді Макинян тыңдаудан кейін. 

Оның айтуынша, бұрынғы президенттің қашып кетуі мүмкін деген болжам қисынсыз. 

– Ақыл-есі дұрыс адам Арменияның үшінші президенті жасырынғысы келетініне шынымен сене ме? - деп қосты адвокат. 

Бұған дейін Никол Пашинянның Армения мемлекетінің бейбітшілік қағидаттарына сүйенетін Төртінші Республикаға айналатынын мәлімдегенін жазған едік.