Асанәлі Әшімовтің соңғы мәрте спектакльде айтқан әсерлі сөзі желіде кеңінен тарап кетті (ВИДЕО)

Қазақ өнерінің абыз ақсақалы, КСРО және Қазақстанның халық әртісі **Асанәлі Әшімов**тің сахнадағы соңғы өнерінен түсірілген бейнежазба әлеуметтік желіде кеңінен тарады, деп хабарлайды Arasha.kz.

Асанәлі Әшімов соңғы рет 13 желтоқсанда Астанадағы Қалибек Қуанышбаев атындағы Қазақ ұлттық музыкалық драма театры сахнасына шыққан. Ол өзінің өмір жолын арқау еткен "Тағдыр тақтасы" спектаклінде көрерменмен қоштасқандай әсер қалдырды.

Қойылым аяқталған соң сахна төрінде сөз алған актер залға жиналған жұртшылыққа жүрек түкпіріндегі толғанысын жеткізді.

"Қазақ болып туғаныма қуанамын! Әсіресе, оның өнерін қуғаныма қуанамын! Экраннан, сахнадан жақсы кейіпкерлер жасап, өмірге қайта қуанамын! Менің көрерменім, барлық еңбегім – сіздердің арқаларыңызда. Барлық еңбегімді сіздерге арнаймын. Сіздердің қол шапалақтарыңыздан артық маған атақ жоқ! Әрдайым өнер – сіздердікі, өнер – халықтікі. Халық өнер арқылы өседі", – деп тебіренді Асанәлі Әшімов.

Асанәлі Әшімов – кеңестік және қазақстандық театр мен кино өнерінің аса көрнекті өкілі, ұлттық мәдениеттің биік белесі. Ол актер ғана емес, режиссер, ұстаз ретінде де бірнеше буын өнерпаздың қалыптасуына ықпал етті. Заңғар тұлға 1937 жылғы 8 мамырда Жамбыл облысының Сарысу ауданында дүниеге келген.