АШМ: Қазақстанда еттің келісі 15 20 мың теңге болмайды

Ауыл шаруашылығы министрлігі еттің күрт қымбаттауы және оны Өзбекстаннан импорттау қажеттілігі туралы болжамдарды жоққа шығарды. Бұған дейін экономика ғылымдарының докторы, АӨК саласының сарапшысы Төлеутай Рахымбеков осындай мәлімдеме жасап, болашақта ет өнімдерінің бағасы килограмына 15-20 мың теңгеге жетуі мүмкін деп болжаған болатын, деп хабарлайды Zakon.kz.

Қазақстанның ауыл шаруашылығы вице-министрі Азат Сұлтанов елде мал шаруашылығы күткен қарқынмен болмаса да дамып келе жатқанын атап өтті. Оның айтуынша, саланы қолдау шараларының кешені қалыптастырылған. Олардың арасында мал сатып алуға жеңілдікті несие беру, асыл тұқымды малдар импортына субсидия беру, сондай-ақ марал шаруашылығы мен қоян шаруашылығын қоса алғанда, жаңа бағыттарды дамыту жұмыстары бар.

«Біз Орталық Азия нарығында қазақстандық етке деген сұраныстың жоғары екенін көріп отырмыз. Жылқы еті бойынша Еуропа нарықтарын ашып, Қытаймен белсенді жұмыс атқарып отырмыз. Бізді Түркия нарығы қызықтырады, онда сиыр етінің бағасы өте жоғары», — деп атап өтті Сұлтанов. 

Ол экспорттық сұраныстың ел ішіндегі бағаның өсуіне әкелмеуі үшін асыл тұқымды және тауарлық мал басын сатып алуды жеңілдікпен қаржыландыру бағдарламасы іске қосылғанын айтты. Оның айтуынша, өндірісті ұлғайту ішкі нарықтағы жағдайды тұрақтандыруы тиіс.

«Бұл шаралардың барлығы ақыр соңында барлық жануар түрлерінің басын еселеп арттырады және ішкі нарықты толықтай қамтамасыз етеді. Сондықтан Қазақстан сиыр етін импорттауға мәжбүр болады деу түбірімен қате», - деп қорытындылады сөзін вице-министр.

Бүгін, 15:05