Әскерде зорлық жасады : ақша табу үшін елді алдаған астаналық сотталды

АСТАНА, 21 шілде – Sputnik. Ақша табу үшін Threads желісінде әскердегі зорлық-зомбылық туралы жалған ақпарат таратқан 23 жастағы астаналық сотталды, деп хакбарлайды Polisia.kz.

"Әскери қызмет кезінде өзіне жыныстық зорлық-зомбылық жасалғанын ойдан шығарып, өміріне қауіп төніп тұрғанын айтып, шетелге кету үшін қаржылай көмек сұраған. Жазбаға ақша аударуға арналған банк реквизиттерін де қоса көрсеткен", - дейді полиция.

Әлеуметтік желіні пайдаланушылардың бірі бұл жігіттің үстінен шағым түсірген. Полиция ақпараттың шындыққа сәйкес келмейтінін анықтады.

"Сотталған азамат ешқашан әскери қызмет өтемеген. Ақша жинау үшін ол мән-жайды білмейтін 17 жастағы танысының банк шотын пайдаланған. Екі күннің ішінде бұл шотқа 15-тен астам ақша аударымы түскен", - дейді ішкі істер министрлігі.

Тергеу барысында күдікті жалған ақпаратты тек ақша табу мақсатында жариялағанын мойындады.

Алаяқтық және көрінеу жалған ақпарат тарату фактілері бойынша қылмыстық іс қозғалды. Сот шешімімен ол кінәлі деп танылып, 3 жылға бас бостандығынан айырылды.