Әскерден кейінгі білім: 1000 нан астам қазақстандық грант иегері атанды

Салтанатты рәсім Еркеғали Рахмадиев атындағы мемлекеттік академиялық филармонияда өтті. Іс-шараға Қорғаныс министрлігі мен Астана қаласы қорғаныс істері жөніндегі департамент басшылығы, Парламент Сенатының депутаттары, әскери қызметшілер, ардагерлер мен жастар қатысты.

– Бұл сертификат – сендердің адал қызметтеріңнің лайықты жемісі. Осы мүмкіндікті алдағы уақытта сенімді өсіп-өркендеу үшін тиімді пайдалана біліңдер, – деді Қорғаныс министрінің орынбасары генерал-майор Асқар Мұстабеков.

Салтанатты жиында Сенат депутаты Ғалиасқар Сарыбаев та құттықтау сөз сөйлеп, әскери қызметтің жастар өміріндегі маңызын атап өтті. Сонымен қатар әскери қызметшілердің туыстары да мемлекет тарапынан көрсетілген қолдауға ризашылық білдірді.

Грант иегерлерінің қатарында Л.Н. Гумилев атындағы Еуразия ұлттық университетінде оқуға жолдама алған кіші сержант Бейбарыс Хасен бар.

– Мен үшін бұл әскердегі басты жетістігім. Командирлерім мен жақындарыма қолдау көрсеткені үшін алғысымды білдіремін, – деді ол.

Қорғаныс министрлігінің мәліметінше, «Сарбаз 2.0» жобасы аясында әскери борышын өтеген азаматтарға ҰБТ тапсырмай-ақ жоғары оқу орындарына түсу мүмкіндігі беріледі. Сонымен қатар үздік сарбаздарға жатақхана мен шәкіртақы қарастырылған.

2023–2025 жылдары жүйеде 180 мыңнан астам әскери қызметші тіркеліп, олардың ішінде «Көктем–2025» шақырылымы бойынша 18 мыңнан астам адам грант алған. Білім гранттары түрлі күштік құрылымдар арасында бөлінген.

Қазіргі таңда «Сарбаз 2.0» жобасы жастарға білім алу мен кәсіби дамуға жол ашатын тиімді тетікке айналды.

Айта кетейік, бұған дейін Қорғаныс министрлігі әскери қызметшілерді негізінен қандай мамандықтарға баулитыны хабарланды.