Астана аспанында аэротакси

Суретті түсірген – Ерлан ОМАР, «EQ»

Аэротакси сырттай қарағанда тікұшаққа ұқсайды. Бірақ ұшу тәсілі де, мүмкіндігі де мүлде бөлек. Қытайлық «AutoFlight» компаниясы әзірлеген Prosperity әуе кемесі тік көтеріліп, тік қона алады. Бір ұшқыш пен бес жолаушыға арналған шағын ұшақ сағатына 200 шақырым жылдамдықпен ұшады. Қуаты да 200 шақырым қашықтыққа жетеді.

Әуе кемесі толықтай электр қуатымен жұмыс істейді. Сондықтан ауаға зиянды қал­дық шығармайды әрі дәстүрлі тікұшақтарға қарағанда әлдеқай­да тыныш ұшады.

Бұл – еліміз үшін мүлде жаңа дүние. Бұған дейін мұндай көлік түрін пайдалану үшін қажетті заңнамалық база болмаған еді. Енді оның құқықтық негіздері толыққанды жасалды. Прези­дент Қасым-Жомарт Тоқаев қол қойған заң электрлі тік ұшып-қонатын әуе кемелерінің, вертипорттардың және төмен биіктіктегі әуе қозғалысын басқару жүйесінің құқықтық мәртебесін айқындайды.

Астана аспанындағы алғаш­қы ұшу – еліміздің жаңа технологияларды енгізуге дайын екенін тағы бір мәрте көрсетті.  Аэротакси болашақта жолаушы тасымалымен ғана шектелмейді. Ол жедел медициналық көмек көрсетуге, құтқару жұмыстарын жүргізуге, шұғыл жүк жеткізуге, табиғи апаттар кезінде әрекет етуге, туристік бағыттарды дамытуға да кеңінен қолданылуы мүмкін. Әсіресе көлік қаты­насы қиын немесе халық тығыз ор­наласқан аймақтар үшін мұн­дай технологияның тиімділігі жоғары.

Әлемдік тәжірибе мұндай технологияның келешегі зор екенін көрсетіп отыр. АҚШ, Қытай, Оңтүстік Корея, Біріккен Араб Әмірліктері мен Еуропаның бірқатар мемле­кеті қалалық әуе мобильдігін дамытуға қомақты инвестиция салып келеді. Ірі қалалардағы көлік кептелісі, экологиялық мәселелер мен уақыт үнемдеу қажеттілігі жаңа көлік түріне деген сұранысты арттырды. Сарапшылардың болжамынша, алдағы онжылдықта электр қуатымен жүретін аэротаксилер халық саны көп қалаларда басты көлік түріне айналады.

Елордада өткен де­мон­­­­­­­стра­­ция­лық ұшуға мем­лекет­тік органдар мен ­авиа­ция са­ласы­ның мамандары, инвестор­лар мен халықаралық серіктес компаниялардың өкілдері қатысты. Жобаны қазақстандық «Alatau Advance Air Group Ltd.(AAAG)» компания­сымен бірге Оңтүстік Кореяның «Korea Airports Corporation», Италияның «UrbanV» және Қытайдың «AutoFlight» компаниялары іске қосып жатыр.

Жалпы, қалалық әуе мобильдігін дамытудың ­пило­т­тық алаңы ретінде Алатау қаласы таңдалған. Жаңа шаһар­да вертипорттар салу, төмен биіктіктегі әуе қозғалысын цифрлық басқару жүйесін енгізу, техникалық қызмет көрсету орталықтарын ашу және өңірдегі алғашқы UAM Center Eurasia орталығын құру жоспарланып отыр. Мұнда әуе көлігін пайдалану ғана емес, жаңа технологияларды сынақтан өткізу, мамандар даярлау мен өндірістік жобаларды дамыту көзделген.