Астана көші қон қызметінің бұрынғы басшысы Ербол Махметов ұсталды: ҰҚК түсініктемесі

Ұлттық қауіпсіздік комитеті Астана қалалық көші-қон қызметі басқармасының бұрынғы басшысының ұсталуына қатысты пікір білдірді, деп хабарлайды Tengrinews.kz.

Бұқаралық ақпарат құралдары мен әлеуметтік желілерде Астана Полиция департаменті көші-қон қызметі басқармасының бұрынғы бастығы Ербол Махметовтің ұсталғаны туралы ақпарат тарады. Оның Астана қалалық ПД көші-қон қызметі басқармасы бастығының орынбасары Әлия Мақаеваға қатысты қозғалған қылмыстық іске қатысы болуы мүмкін екені хабарланды. Бұған дейін Мақаеваның ұсталғаны және оған қатысты сотқа дейінгі тергеу амалдары жүргізіліп жатқаны белгілі болды.

Бұл ретте ҰҚК Махметовтің ұсталуы мен Мақаеваға қатысты қылмыстық істің өзара байланысы бар-жоғын әзірге нақтыламады.

ҰҚК баспасөз қызметі Ербол Махметовтің ұсталуына қатысты сауалға берген жауабында қазіргі уақытта сотқа дейінгі тергеу жүріп жатқанын хабарлады.

"Қылмыстық-процестік кодекстің 201-бабы 1-бөлігіне сәйкес, өзге ақпарат жария етуге жатпайды", - делінген ҰҚК баспасөз қызметінің хабарламасында.

Астанада көші-қон қызметі басшысының орынбасары Әлия Мақаева ұсталды

Еске сала кетейік, тамыз басында Астана ПД көші-қон қызметі басқармасы бастығының орынбасары Әлия Мақаева қылмыстық іс бойынша ұсталған болатын. Сол кезде желіде оның заңсыз көші-қонды ұйымдастырды деген күдікке ілінгені туралы ақпарат тарады. Сондай-ақ тергеудің шетелдік азаматтарға тұруға ықтиярхатты заңсыз ресімдеумен байланысты болуы мүмкін екені айтылды.

Бұған дейін Ішкі істер министрлігінің Tengrinews.kz редакциясының сауалына берген жауабында ведомствоның өз қатарында заңдылық пен қызметтік тәртіпті қамтамасыз ету бойынша тұрақты түрде жүйелі жұмыс жүргізетіні айтылған болатын.

"Басым бағыттардың бірі - құқық бұзушылықтарды анықтау, алдын алу және жолын кесу, сондай-ақ заң бұзушылыққа жол берген қызметкерлерден қатарды тазарту. Әрбір анықталған факті бойынша қолданыстағы заңнама талаптарына сәйкес шаралар қабылданады. Бұл жұмыс уәкілетті мемлекеттік органдармен өзара іс-қимыл негізінде жүзеге асырылады және заңдылықты қамтамасыз етуге, қызметтік тәртіпті нығайтуға, сондай-ақ азаматтардың құқықтары мен заңды мүдделерін қорғауға бағытталған", - делінген ІІМ-нің ресми жауабында.

Сондай-ақ ведомство Мақаеваға қатысты сотқа дейінгі тергеуді ұлттық қауіпсіздік органдары ІІМ-нің Өзіндік қауіпсіздік департаментімен бірлесіп жүргізіп жатқанын атап өтті.

Қазақстан Конституциясының 77-бабына сәйкес, адамның кінәлілігі заңды күшіне енген сот үкімімен дәлелденгенше, ол жасалған қылмысқа кінәлі емес деп есептеледі.

Google News арқылы жаңалықтарымызды қадағалаңыз