Астанада донор қанының көмегімен жараларды емдейді

Донор қаны туралы сөз болғанда, адамдар әдетте оны тек ота жасау немесе ауыр сырқат кезінде құю деп түсінеді. Алайда қанның мүмкіндіктері бұдан әлдеқайда кең. Қазақстанда оның компоненттері зақымдалған тіндерді қалпына келтіру және күрделі жараларды жазу үшін қолданылады. Бұл қандай технология және қалай жұмыс істейді - Tengri Health тілшісі анықтап көрді.

Донор қанымен жараны емдеуге қалай көмектеседі?

Бұл әдісті енгізіп жатқан Денсаулық сақтау министрлігінің Трансфузиология ғылыми-өндірістік орталығының өкілдері оның негізінде тромбоциттердің ерігіш факторларымен байытылған плазманы қолдану жатқанын айтты.

Дәрігер-трансфузиолог, Денсаулық сақтау министрлігі Трансфузиология ғылыми-өндірістік орталығының басқарма төрағасы Сәния Әбдірахманова ол қалай жұмыс істейтінін түсіндірді.

"Қарапайым тілмен айтқанда, тромбоциттер - бұл ағзаға қан тоқтатуға көмектесетін қан жасушалары. Олар белсендірілген кезде арнайы заттар - өсу факторлары мен тіндерді қалпына келтіруге қатысатын басқа да биологиялық белсенді компоненттерді бөліп шығарады", - деп түсіндіреді Әбдірахманова.

Әдіс келесі жағдайларда қолданылады:

ұзақ уақыт бойы жазылмайтын жараларды емдеу үшін; бедеулік диагнозы қойылған әйелдерде, соның ішінде ЭКО-ның сәтсіз әрекеттерінен кейін эндометрийді қалпына келтіру үшін; травматологияда, ортопедияда және спорттық медицинада - жарақаттан кейін тіндерді қалпына келтіру үшін.

Анықтама: Эндометрий - бұл жатырдың ішкі шырышты қабаты, ол әрбір етеккір циклінде гормондар әсерінен қалыңдап, содан кейін етеккір кезінде ішінара ажырап түседі де, қайта қалпына келеді. Егер эндометрий тым жұқа болса немесе зақымдалса, бұл эмбрионның имплантациялану ықтималдығын төмендетуі мүмкін.

Байытылған плазма пациенттің өз қанынан да, донор қанынан да алынады. Инъекция пациенттерге салынады.

Әбдірахманованың айтуынша, жұмыстың басты бағыттарының бірі - ұзақ уақыт жазылмайтын жаралары мен ойық жаралары бар, соның ішінде диабеттік табан синдромына шалдыққан адамдарға көмектесу.

Анықтама: Диабеттік табан синдромы - бұл қант диабетінің асқынуы, бұл кезде аяқ басының жүйкелері мен тамырлары зақымдалады.

"Мұндай пациенттер үшін кішкентай жараның өзі күрделі мәселеге айналып, айлап жазылмауы мүмкін. Сондықтан тіндердің қалпына келуін жеделдетудің жаңа тәсілдерін іздеудің маңызы зор", - деп атап өтті сарапшы.

Екі аптада жазылды: пациенттердің нәтижелері

Орталық терінің ауыр зақымдануы кезінде осы әдістемені қолданудың мысалдарын бөлісті.

Күрделі жағдайлардың бірі қант диабеті мен көптеген ойық жарасы және қажалған терісі бар диабеттік табан синдромына шалдыққан 43 жастағы ер адамға қатысты болды. Жара 10 апта ішінде емделді, ол үшін мамандар препараттың 23 дозасын қолданды.

Аяғында созылмалы трофикалық ойық жарасы бар әйелде (мұндай жаралар әдетте өте ұзақ жазылмайды) емдеу төрт аптаға созылды.

"Айта кету керек, бұл қосымша әдіс ретінде қолданылады. Созылмалы жара кезінде негізгі ауруды бір мезгілде бақылауда ұстау, қажетті хирургиялық және жергілікті ем жүргізу, жараны күту және таңғыштарды ауыстырып тұру маңызды", - деп атап өтті Сәния Әбдірахманова.

Орталық мамандарының мәліметінше, қалпына келтіру үшін тромбоциттердің ерігіш факторларымен байытылған плазма қолданылған пациенттерде жараның жазылу процесінің оң динамикасы байқалған.

Бұған дейін Алматыда қандай қан тапшы және неге әрбір бесінші донордан бас тартылатыны туралы жазған едік.

Google News арқылы жаңалықтарымызды қадағалаңыз

Жазылу

емдеу

Қазақстан

Астана