Астанада масаға қарсы дезинсекция басталды: 8600 гектар су айдыны өңделді

Қала әкімдігінің мәліметінше, сәуір айының басынан бері маса дернәсілдері анықталған 8600 гектар су айдыны өңделген.

– Дезинсекция екі ауысымда жүргізілуде. Су айдындарын өңдеу аяқталғаннан кейін 27–29 сәуір аралығында қаланың орталық бөлігін жаппай өңдеу басталады. Жұмыстар орталықтан шет аймақтарға қарай ығыстыру әдісімен жүргізіледі, – делінген хабарламада.

Мамандардың айтуынша, жәндіктерді толық жою көзделмейді, алайда жүргізілетін шаралар олардың санын 90%-ға дейін азайтуға мүмкіндік береді.

Дезинсекция түнгі уақытта – сағат 21:00-ден 04:00-ге дейін өтеді. Әр кезең 20 күнге созылады, жалпы алты кезең жоспарланған.

Жұмыстарға 150-ден астам арнайы дайындықтан өткен маман тартылған. Өңдеу барысында механикалық бүріккіштер, арнайы техникалар, квадрокоптерлер және ірі су айдындарында жабдықталған қайықтар қолданылады.

Сондай-ақ басқарушы компаниялар мен түрлі нысандарға жертөлелерді құрғату, аумақтарды абаттандыру және қосымша дезинсекция жүргізу тапсырылған.

Айта кетейік, қауіпсіздік мақсатында тұрғындарға өңдеу жүргізіліп жатқан аумақтарға бармау және жұмыстар кезінде терезелерді жабу ұсынылады.

Бұған дейін Алматыда кенелерге қарсы дезинсекциялық өңдеу жұмыстары басталғаны хабарланды.