Астаналық шабандоз Хайнань турының тағы бір кезеңінде жеңіске жетті

Линшуйден Баотинге дейінгі 132,7 шақырымдық жарыс кезеңі соңғы шақырымда тартысқа толы болды. Әсіресе 2,6 шақырымдық өрмелеу кезінде көшбасшылардың шағын тобы, оның ішінде Томас Сильва мен Николас Винокуров алда жүрді.

Қарсыластардың бірнеше шабуылынан кейін Томас Сильва мәре сызығын бірінші кесіп, командасына тағы бір мәрте жеңіс сыйлады. Екінші орынды Томас Песенти (Team Polti VisitMalta), үшінші орынды Алессандро Фанселлу (MBH Bank CSB Telecom Fort) иеленді. Азия турнирінің кестесінде көшбасшы Николас Винокуров (көк жейде) төртінші болып мәреге келді.

– Бүгінгі жарыста командама көрсеткен қолдауы үшін алғыс айтамын. О баста команда барлығын толық бақылауда ұстады. Жоғарыға көтерілген кезде мен жақсы позицияда болдым, содан кейін Николаспен бірге көшбасшы топқа ендік, - дейді Хайнань турының төртінші кезеңінде жеңіске жеткен Томас. 

Ол аптап ыстықта жарысу қиын болғанымен, команда тапсырманы ойдағыдай орындап шыққанын тілге тиек етті.   

– Ертең мен сары жейдені киемін. Бүгінгі жетістігім – ең алдымен біздің команда үшін маңызды. Сондықтан бұл жеңісті XDS Astana командасына, сондай-ақ өз отбасыма және еліме арнаймын. Уругвайда түн ортасы болғанымен, отбасым жарысты қарап, мені қолдады. Жалпы есеп бойынша біз бұл нәтижені сақтап қалуға тырысамыз, - деді Томас Сильва.

Томас Сильва жалпы есепте көш бастап, сары жейдені иеленіп отыр. Ал Николас Винокуров жалпы есепте 6-орынға тұрақтады.

Бұдан бұрын велотректен Азия чемпионатында Қазақстан қоржынында 11 медаль бар екенін хабарлаған едік.