Астананың сол жағалауындағы үйлерде интернет жоғалды не болды

Астананың сол жағалауындағы тұрғындар "Қазақтелеком" операторы ұсынатын интернет пен үй телефоны байланысының жоқтығына жаппай шағымданып жатыр. Компания іркіліс себебін түсіндірді, деп хабарлайды Tengrinews.kz тілшісі.

Байланысқа не болды?

Tengrinews.kz редакциясына әртүрлі тұрғын үй кешенінде тұратын астаналықтардан көптеген хабарлама түсіп жатыр.

Қала тұрғындарының айтуынша, тұтас кіреберіс пен үйлер желіге қосыла алмай отыр, ал провайдердің колл-орталығына хабарласу өте қиын.

"Қазақтелекомның" бүкіл сол жағалауы дерлік істемей тұр. Апат болған", – деп жазады оқырмандар.

"11-кіреберісте интернет толығымен жоқ. Кіреберістегі жер жұмыстары кезінде кабельді зақымдап алған сияқты. Бүкіл ТК бойынша байланыс жоқ", – деп бөлісті елорда тұрғындарының бірі.

"Қазақтелеком" іркіліс дерегін растады. Ондағылар компания кабелін "бөгде ұйым" зақымдағанын айтты.

"21 шілдеде күндіз Алматы мен Ақмешіт көшелері қиылысында (Сауран көшесі, 12 ауданында), бөгде ЖШС көлденең-бағытталған бұрғылау әдісімен жер жұмыстарын жүргізу кезінде АТС-40 қызмет көрсету аймағына жататын түрлі сыйымдылықтағы 25 оптикалық кабельді зақымдады", – деп хабарлады "Қазақтелеком".

Компания өкілдері оқиға орнында апаттық бригадалар жұмыс істеп жатқанын жеткізді. Зақымдану көлемінің үлкендігі мен жөндеу жұмыстарының күрделілігіне байланысты байланыс кезең-кезеңімен қалпына келтіріледі.

Абоненттерді толықтай қосу сағат 23:00-ге дейін жоспарланған.

"Қазақтелеком" мұндай жағдайлар жиі, әсіресе жазда қайталанатынын атап өтті. Көбінесе кабельдер жер және құрылыс жұмыстары кезінде зақымдалады. Компания мәліметінше, мердігерлер жұмысты келіспестен және байланыс желілерінің қайда өтетінін анықтамастан, бұрғылау немесе коммуникация тарту жұмыстарын бастап кетеді.

Бұған дейін біз мобильді байланыс пен интернет сапасының нашарлауына сертификатталмаған сигнал күшейткіштер (репитерлер) себеп болуы мүмкін екенін жазған болатынбыз. Жасанды интеллект және цифрлық даму министрлігінің мәліметінше, мұндай құрылғылар базалық станцияларға кедергі келтіреді. Соның салдарынан байланыс сапасы құрылғы иелерінде ғана емес, көршілерінде де нашарлауы мүмкін.

Google News арқылы жаңалықтарымызды қадағалаңыз