Атырау облысында ауа райы ​15 желтоқсанда ​тұрақталады

Атырау облысында ауа райы бірте-бірте тұрақталады деп күтілуде. 

Бұл туралы «Қазгидромет» РМК Атырау облысы бойынша филиалының орталық гидрометеорологиялық ғылыми-тәжірибелік зертханасының басшысы Вера Корнева мәлім етті.

Оның айтуынша, 14 желтоқсанда Атырау облысында қар, төменгі боран және көктайғақ байқалды. Облыстың бірқатар аудандарында желдің жылдамдығы күшейіп, Индер ауданында солтүстік-батыс бағыттағы желдің екпіні 26 м/с-қа, ал Атырау қаласында 24 м/с-қа дейін жетті. Қар мен төменгі боран облыстың басым бөлігінде тіркелді. 

- 14 желтоқсан күні және 15 желтоқсанға қараған түні солтүстік-батыс бағыттағы желдің жылдамдығы 15–20 м/с, екпіні 23–28 м/с шамасында сақталады. Ал 15 желтоқсан күні Атырау облысында ауа райы біртіндеп тұрақталып, желдің жылдамдығы бәсеңдейді. Күндіз жел 9–14 м/с-қа дейін төмендейді, кей жерлерде екпіні 15–20 м/с болуы мүмкін. Атырау қаласында жауын-шашынсыз, ауыспалы бұлтты ауа райы күтіледі,- деді В.Корнева.

Осы орайда Атырау қаласында зардап шеккен нысандар аумағында қауіпсіздікті қамтамасыз ету жұмыстары жүргізілуде.  қалалық Төтенше жағдайлар басқармасы бастығының орынбасары Айбек Құспанғалиев мәлім еткендей, ауа райының қолайсыздығына байланысты Атырау қаласындағы бірқатар тұрғын үй мен әлеуметтік нысандардың шатыры бүлінді. 

- Қазір құлаған шатырларды жинау, өтіп бара жатқан адамдарға қауіп төндіріп тұрған шатыр бөлшектерін алып тастау, аумақты оқшаулау және қауіпсіздікті қамтамасыз ету жұмыстары жүргізіліп жатыр. Бұған 74 ТЖБ қызметкері, 8 техника және «АрнаулыАвтобаза» мекемесінің қызметкерлері жұмылдырылған. Зардап шеккендер жоқ,- деді ол.

Атырау облысы ТЖД құтқарушылары тәулік бойы кезекшілікте тұр. Жағдай бақылауда. Қала тұрғындарынан ауа райының қолайсыздығына байланысты қауіпсіздік шараларын сақтауды сұрайды ТЖД мамандары. 

Бүгін, 10:31