Атырау университетінің 85 жылдығында ұстаздар марапатталды

Атырау қаласында Х.Досмұхамедов атындағы Атырау университетінің 85 жылдығына арналған «Жемісті еңбек, даңқты белес, сенімді келешек» атты салтанатты шара өтті. Мерейтойға оқу орнының профессор-оқытушылар құрамы, ардагер ұстаздар, түлектер мен арнайы шақырылған қонақтар қатысты.

Іс-шара барысында Атырау облысы әкімінің орынбасары Дарын Шамұратов университет ұжымын құттықтап, білім мен ғылым саласындағы жетістіктерге тоқталды. Аймақ басшысының атынан екі қызметкерге Құрмет грамотасы, бес ұстазға Алғыс хат табысталды.

Сондай-ақ ҚР Парламенті Сенатының Төрағасы Мәулен Әшімбаев пен Ғылым және жоғары білім министрі Саясат Нұрбектің құттықтаулары оқылды. Министрлік тарапынан 34 қызметкерге түрлі марапаттар берілді. Олардың қатарында «Ғылымды дамытуға сіңірген еңбегі үшін», «Ахмет Байтұрсынұлы», «Еңбек ардагері», «Ана тілін дамытуға қосқан үлесі үшін» төсбелгілері, «Тіл жанашыры», «Ғылым үздігі», «Жоғары білім беру ісінің үздігі» дипломдары, сондай-ақ министрдің Құрмет грамоталары мен Алғыс хаттары бар.

Мерекелік жиында қоғам және мемлекет қайраткерлері — ҚР Журналистер одағының төрағасы Мереке Құлкенов, академик Ережеп Мәмбетқазиев және Атырау облыстық Ардагерлер кеңесінің төрағасы Мұрат Өтешов сөз сөйлеп, жылы лебіздерін білдірді.

Айта кетейік, 1940 жылы негізі қаланған Х.Досмұхамедов атындағы Атырау университеті — еліміздің батыс өңіріндегі алғашқы жоғары оқу орындарының бірі. Бүгінде мұнда 8 мыңға жуық студент білім алып, 400-ге жуық оқытушы-профессор қызмет етеді.

Бүгін, 13:27