​Атырауда балық өсіру шаруашылықтарына жер телімдері беріледі.

Атырау облысында балық өсіру шаруашылықтарына жер телімдерін беру жоспарланып жатыр.

Бұл бастама PROtection жобасы аясында жүзеге асырылмақ.

облыс әкімінің орынбасары Марат Мурзиевтің төрағалығымен өткен жиында айтылғандай, қазір Дамбы ауылдық округі аумағынан шаруашылықтар үшін 100 гектар жер телімі бөлініп, тиісті құжаттары рәсімделген. 

Ендігі кезеңде жерлерді бөлу, сондай-ақ инфрақұрылым жүйелерін тиімді пайдалану мәселелері қаралып жатыр. 

Мамандардың айтуынша, жоба су ресурстарына тікелей тәуелді болғандықтан, су лимиттерін ұтымды жоспарлау және тиімді пайдалану аса маңызды. 

Жиында айтылған ақпарат бойынша, 2025 жылы облыстағы балық шаруашылығы жобалары 1,55 млн текше метр су жинап, оның 1,26 млн текше метрі пайдаланылған.

Осыған байланысты, биыл балық шаруашылықтарына бөлінген 4,2 млн текше метр су лимиті ірі жобаларды толық жүзеге асыруға жеткіліксіз болуы мүмкін екені айтылды.

Осы мәселелерді ескере отырып, жиында инфрақұрылымды дамыту, экологиялық рұқсаттарды рәсімдеу және су ресурстарын тиімді пайдалану мәселелері негізгі назарға алынды. Әсіресе, агроиндустриалдық аймақтың әлеуетін арттырып, балық шаруашылығына қатысты шағын жобалармен қатар ірі инвестициялық бастамалар туралы сөз болды. 

Бүгін, 14:12