АтырауНефтеМаш этиленді бөлу бағанасын сынақтан өткізді

«АтырауНефтеМаш» ЖШС полиэтилен зауытына арналған ең ірі технологиялық жабдықтың өндірісінде маңызды кезеңге жетті. Кәсіпорын алаңында этиленді бөлу бағанасы гидравликалық сынақтан сәтті өтті.

Диаметрі 7,5 метр, биіктігі 101 метр және салмағы шамамен 1,5 мың тонна болатын бұл бағана – отандық машина жасау саласында әзірге ең ірі әрі ауыр жабдықтардың бірі. Сынақ барысында бағанаға 4,4 мың текше метр су құйылып, қысым 3 МПа деңгейіне дейін көтерілді. Нәтижесінде жабдықтың қауіпсіздік пен сенімділік талаптарына толық сәйкес келетіні дәлелденді.

Қазір бағана сырлау жұмыстарына дайындалып, «Ұлттық индустриялық мұнай-химия технопаркі» арнайы экономикалық аймағындағы полиэтилен зауытының құрылыс алаңына жөнелтілуге әзірленуде. Бұдан бөлек, кәсіпорын салмағы 700 тоннадан асатын, биіктігі 50 метрлік суыту бағанасын және 145 тонна салмақты деаэратор жабдығын да дайындап жатыр.

Бұл жобалар жергілікті қамтуды дамытуға нақты үлес қосып, қазақстандық машина жасаушылардың ірі мұнай-газ химиясы жобаларын жүзеге асырудағы мүмкіндіктерін кеңейтіп отыр. Силлено полиэтилен зауытына арналған жабдықтарды отандық кәсіпорындарда өндіру ел өнеркәсібінің дамуына және жаңа өндірістік әлеуеттің қалыптасуына жол ашуда.

Бүгін, 14:16