Батыс Еуропа Батыс Қытай дәлізі: елімізге түсетін пайда артты

1,5 айдан 10 күнге дейін қысқарған жол. Бұл «Батыс Еуропа – Батыс Қытай» бағыты. Ірі жоба 2017 жылы толық іске асқанымен, оны алдағы уақытта одан әрі жетілдіру жоспарланған. Қаперге алынғаны – қауіпсіздік. Сондай-ақ сапаны арттыру үшін ақылы жол жүйесін кеңейтіп, интеллектуалды басқару технологияларын енгізу көзделген. Көлік магистралінің пайдасы көл-көсір.

Дәліз Қытайды Еуропамен жалғайды. Яғни Ляньюньган теңіз портынан басталып, Тынық мұхитқа төте жол ашылды. Сосын Ресей арқылы жүреді. Ортада Қазақстан тұр. Құрлықтың негізгі күретамырының ұзындығы 8445 шақырым. Соның 3425 шақырымы Қытайдан, ал 2233 шақырымы Ресейден өтеді. Трассаның үштен бірі, яғни 2787 километрі елімізге тиесілі. Осылайша қозғалыс 1,5 айдан 7-11 күнге дейін кемісе, тасымал шығыны 35%-ке дейін төмендеген. Ел үшін экономикалық әсері елеулі. Халықаралық транзиттен түсетін төлемдер мен алымдар мемлекет қазынасын толықтырады. Әлемдегі беделі артып, шетелдік инвестиция тартуға қолайлы жағдай жасалады. Аталған бағытта электроника мен тұрмыстық техника, түрлі машиналар мен көлік бөлшектері, дайын тоқыма және киім өнімдері жеткізіледі. Фармацевтикалық тауарлар, интернет-дүкендерден тапсырыс берілетін заттар мен жарамдылық мерзімі аз азық-түліктер мен ауыл шаруашылығы өнімдері тасымалданады. Қысқасы бағасы жоғары әрі уақытқа тәуелді жүктер осы жолды таңдайды.