​ Бес күн өзіміз жаттықтық : Атыраудың бұрынғы қорғаушысы клубтан кету сырын ашты

Беларусьтің танымал қорғаушысы Руслан Юденков күтпеген жерден «Атыраудан» павлодарлық «Ертіске» ауысты. Sports.kz сайтына берген сұхбатында ол клубтан кетуінің астарындағы жайттарды ашып, атыраулық командадағы ерекше кезеңдерді еске алды.

Гомель қаласының тумасы әрі Беларусь құрамасының бұрынғы ойыншысы Қазақстан футболына жақсы таныс. Ол Премьер-лигада «Мақтаарал», «Қайсар», «Тұран» және «Атырау» сапында жүзден астам матч өткізген. Сондықтан оның Павлодарға жедел трансфері көпшілікті таңғалдырды. Юденковтің айтуынша, «Атыраумен» қоштасу өте тез болған, ал ол өткенді қайта ойлағысы келмейді.

Футболшы клубтағы қиындықтарды да жасырмады:

«Бұл жыл өте ауыр болды. Қазіргі «Атыраудың» көрсетіп жүрген ойыны мүмкін емес нәрсе. Біз оқу-жаттығу жиындарын бір бапкерлік штабпен өткіздік, бірақ елге келгенде бес күн бойы бас бапкерсіз өзіміз жаттықтық. Бір тәжірибелі маман ғана процесті ұйымдастырды (күледі). Кейін ойынға екі-ақ күн қалғанда Владимир Чебурин келді де, біз соңғы жылдардағы ең үздік маусым бастауын жасадық», — деді Юденков.

Қорғаушы маусым соңындағы сәтсіздіктерге қарамастан, «Атырауды» және оның жанкүйерлерін ерекше құрметтейтінін, клубқа өткен жылы «мүмкін емес» жетістікке жетуге көмектескеніне мақтанатынын айтты.

Ал «Ертіске» ауысуына қатысты ол: «Маған тағы екі ұсыныс болды, соның ішінде «Атырауда» қалу мүмкіндігі де бар еді. Бірақ павлодарлық клуб барынша қызығушылық танытты. «Ертіш» — дәстүрі мен жеңістері мол үлкен клуб. Маған басты фактор — адами қарым-қатынас болды. Қазір алдымда тұрған міндет қарапайым: әр ойында жеңіске жету. Иә, алғашқы матчта «Астанадан» ұтылдық, бірақ командада мықты ойыншылар бар. Маусым соңына қарай турнир кестесінің ортасына орнығатынымызға сенемін», — деп түйіндеді ол.

Бүгін, 13:01