Біздің тәсілдеріміз Қытайдың ұстанымымен үндес Қазақстан Президенті ЖИ дамыту туралы

Жасанды интеллект Қазақстан мен Қытай ынтымақтастығының жаңа кезеңіндегі негізгі бағыттардың біріне айналуы мүмкін. Бұл туралы Қазақстан Президенті Қасым-Жомарт Тоқаев "Синьхуа" агенттігіне берген эксклюзивті жазбаша сұхбатында мәлімдеді, деп жазады Tengrinews.kz.

Қазақстан мен Қытай жасанды интеллект саласындағы ынтымақтастықты нығайтып жатыр

Президент технологияларға ерекше назар аударды. Бүгінде Қытай жасанды интеллект, цифрлық технологиялар, робототехника, жаңа энергия көздері және жоғары технологиялық өндіріс саласында көш бастап тұр. Қазақстан өз кезегінде жеделдетілген цифрлық трансформация жолын таңдады.

Қазақстанда 2026 жыл Цифрландыру және жасанды интеллект жылы болып жарияланды.

"Жақында Шанхайға Дүниежүзілік жасанды интеллект конференциясына қатысу үшін барған сапарымда Қытайдың жетекші технологиялық компанияларының басшыларымен мазмұнды кездесулер өткіздім. Цифрлық экономика, зияткерлік өндіріс, электронды коммерция, ғылыми зерттеулер мен кадрлар даярлау салаларында бірлескен жобаларды іске асыруға деген өзара қызығушылық байқалды. Дәл осы технологиялық ынтымақтастық қазақ-қытай ықпалдастығының жаңа кезеңіндегі ең маңызды бағыттардың біріне айналуы мүмкін", - деді Президент.

Тоқаевтың айтуынша, жасанды интеллект бүкіл адамзат игілігі үшін пайдаланылуы тиіс, ал заманауи технологияларға, білім мен есептеу ресурстарына қолжетімділік әділ болуы керек.

"Бұл мәселеде біздің ұстанымдарымыз Қытайдың көзқарасымен үндеседі. Биыл шілде айында Шанхайда Қазақстан Жасанды интеллект саласындағы ынтымақтастық жөніндегі дүниежүзілік ұйымның (WAICO) негізін қалаушы 29 мемлекеттің қатарына енді. Бұл жасанды интеллект саласындағы елдердің күш-жігерін үйлестірудің ашық әрі тиімді халықаралық жүйесін қалыптастыру жолындағы маңызды қадам", - деп атап өтті Тоқаев.

Қазақстан мен Қытайдың халықаралық күн тәртібіндегі ұстанымдары жақын

Екі елдің ынтымақтастығы халықаралық аренада да дамып келеді. Тоқаев Астана мен Бейжіңнің бірқатар түйінді мәселе бойынша ұстанымдары сәйкес келетінін атап өтті.

"Біз Біріккен Ұлттар Ұйымының орталық рөлін нығайту, халықаралық құқық принциптерін қорғау, медиация мен шынайы көпжақтылықты ілгерілету, сондай-ақ қақтығыстарды бейбіт жолмен шешу мәселелерінде ұқсас ұстанымдарды ұстанамыз", - деді Мемлекет басшысы.

Президент Қазақстанның "бір Қытай" саясатын қолдайтынын және мемлекеттердің аумақтық тұтастығы принципінің бұзылуына қарсы екенін баса айтты.

Астана БҰҰ, ШЫҰ және АӨСШК шеңберінде Бейжіңмен үйлестіру жұмыстарын жалғастырады, сондай-ақ "Орталық Азия - Қытай" форматындағы ынтымақтастықты қолдайды.

Тоқаев сонымен қатар 2026 жылы ШЫҰ-ның 25 жылдығы атап өтілетінін еске салды. Оның пікірінше, ұйым "Шанхай рухының" негізгі принциптерін - өзара сенім, теңдік, диалог, мәдени әртүрлілікті құрметтеу және бірлескен дамуға ұмтылуды сақтап қала алды.

Студенттер мен туристер саны артып келеді

Келесі жылы Қазақстан мен Қытай дипломатиялық қарым-қатынастардың орнағанына 35 жыл толуын атап өтеді. Бұл ретте елдер арасындағы өзара іс-қимыл тек мемлекеттік және бизнес деңгейінде ғана емес, барлық салада дамып келеді.

Екі ел азаматтары арасындағы тікелей байланыстар маңызды рөл атқарады. 2026 жылы Қазақстан мен Қытайдың "Мәдениеттердің алмасу жылы" өтеді.

Бүгінде ондаған мың қазақстандық студент Қытайда білім алып жатыр. Сонымен қатар қазақстандық университеттерді таңдайтын қытайлық студенттердің де саны артып келеді. Қазақстанда Қытайдың жетекші жоғары оқу орындарының филиалдары мен "Лу Бань шеберханалары" жұмыс істейді, академиялық ұтқырлық бағдарламалары мен университеттер арасындағы ынтымақтастық кеңейіп жатыр.

Туризмді дамыту жеке бағытқа айналды. Өзара визасыз режим енгізілгеннен кейін Қытайдан Қазақстанға келетін туристер ағыны айтарлықтай өсті.

2025 жылдың қорытындысы бойынша Қазақстанға 962 мың қытайлық турист келді, бұл өткен жылмен салыстырғанда 47 пайызға көп.

"Біз қытайлық достарымызға Қазақстанды барлық қырынан - заманауи Астана мен көне Түркістанды, Алматы таулары мен Маңғыстаудың бірегей ландшафттарын, Ұлы дала мен Ұлы Жібек жолының мұрасын, музыкамызды, ұлттық аспаптарымызды, асханамыз бен қонақжайлылық дәстүрлерімізді көрсеткіміз келеді. Сонымен қатар Қазақстан да бүгінде дамудың таңқаларлық үлгісін көрсетіп отырған көне өркениет елі - Қытайды үлкен қызығушылықпен танып келеді", - деп түйіндеді Президент.

Еске сала кетейік, 1 қыркүйекте Тоқаев Бішкектегі Шанхай ынтымақтастық ұйымының саммитіне қатысты. Өз сөзінде Тоқаев ұйымның ортақ стратегиялық міндеті ретінде - күш пен текетірес мәдениетінің орнын өзара жауапкершілік, бірлескен даму және ұзақ мерзімді ынтымақтастық басатын әлемдік тәртіпті қалыптастыруды атап өтті.

Google News арқылы жаңалықтарымызды қадағалаңыз

Жазылу