Bloomberg: Ұлыбритания, Франция және Германия Ресеймен бейбіт келіссөздер жүргізу жоспарын дайындап жатыр

Ұлыбритания, Франция және Германия Ресейді Украинамен бейбіт келіссөздерге тарту жоспарын әзірлеп жатыр. Бұл туралы өз дереккөздеріне сілтеме жасап Bloomberg хабарлады, деп жазады Би-би-си.

Агенттік сұхбаттастарының мәліметінше, еуропалық шенеуніктер бұл бастаманы украиналық әріптестерімен құпия түрде талқылауды бастап кеткен.

Еуропалық көшбасшылар Мәскеуді келіссөздер үстеліне отырғызуға тырысу үшін қазір қолайлы сәт туды деп есептейді. Бұл АҚШ-тың қатысуымен өтетін осындай келіссөздер процестерінің іс жүзінде тұрып қалуымен және Ресей тарапының майданда айтарлықтай ілгерілеушілік көрсете алмай отырғанымен байланыстырылады.

Сонымен қатар, агенттік дереккөздері бұл процесте Киевтің басты рөл атқара беретінін баса айтады.

«Ресеймен келіссөздерді бастау мәселесінде соңғы сөз Украина Президенті Владимир Зеленскийде қалады. Еуропалық көшбасшылар Украина басшылығына қысым жасауға немесе Киев келіспейтін стратегияны қабылдауға мәжбүрлеуге ниетті емес екендіктерін мәлімдеуде», — деп жазады Bloomberg.

Таяу күндері Ұлыбритания Премьер-министрі Кир Стармер Германия канцлері Фридрих Мерц және Франция Президенті Эммануэль Макронмен ықтимал келіссөз бағыттарын жеке талқылайды деп күтілуде.

Bloomberg журналистері ресми түсініктеме алу үшін үш елдің басшыларына жүгінді. Франция мен Ұлыбритания үкіметтері БАҚ сұрауларына жауап берген жоқ, ал Германия Министрлер кабинеті түсініктеме беруден бас тартты.

Бүгін, 16:07