БҚО да метанол зауыты салынбақ

Батыс Қазақстан облысының Бәйтерек ауданы Белес ауылында жылына 130 мың тонна метанол шығаратын елімізде теңдесі жоқ зауыт салынбақ. Кеше өндіріс орнының алғашқы қадасы қағылды. Кәсіпорынды 2027 жылдың аяғында іске қосу көзделген. Мұнда құрылыс кезінде 1200 адам, зауыт ашылғаннан кейін 467 адам тұрақты жұмыспен қамтылады.

Қазақстанның метанол, яғни техникалық спиртке деген сұранысы жылына 80 мың тонна. Осынша өнім шетелден жеткізіледі. Жаңа салынатын зауыт осы импортты ығыстырмақ. Бастапқыда табиғи газдан тек метанол ажыратылса, кейін терең өңдеу нәтижесінде полимер бұйымдар, тыңайтқыш, аммиак және т.б шығарылмақ. Жоба құны 78 млрд теңге. Оның 20%-ын қытайлық инвестор құйыпты.

Кан Хэ Пинь, инвестор, «SAN BAO» корпорациясының президенті:

- Қазақстанда метанол жоқ, бәрі шетелден әкеледі. Мына зауыт тұрған соң 130 мың тонна шығарады. Қазақстан өзіне жетеді. Ол да жақсы ғой.

Дамир Дүйсенбай, «Жайық петролеум ЛТД» ЖШС директорлар кеңесінің төрағасы:

- Бірінші этап метанол. Сосын формальдегид істейміз бе, аммиак істейміз бе, қазір қарап жатырмыз. Не Қазақстанға керек немесе Қазақстанда импортты жауып тастау керек.

Метанол зауытынан басқа биыл Теректі ауданындағы индустриялды аймақта 24 МВТ газотурбиналық станса, мұнай катализаторлары  зауытының құрылысы басталады. Келер жылы тағы 12 зауыт салынады.

Нариман Төреғалиев, БҚО әкімі:

- Жалпы біз алдағы 5 жылда Батыс Қазақстан облысына 4 триллион үстінде инвестиция тартамыз ба деген жоспарымыз бар. Соның бәрі жүзеге асып кетсе, облыс экономикасына үлкен серпін береді. Екіншіден жұмыс орындары ашылады. Үшіншіден салық. Инвесторлар алдында бірнеше мәселені қойып отырмыз. Бірінші жергілікті жерге тіркелу, екінші жұмыс жасайтын сол компанияларға БҚО азаматтарын жұмысқа алу.

Метанол зауытының алғашқы қадасын қаққан  облыс әкімі өңірдегі өңдеу өнеркәсібін өркендету жұмыстары Президент тапсырмасына сай жүзеге асатынын атап өтті.

 Авторлары: Е. Жылқайдарұлы, Б. Жарылғасов, Э. Аюпов