Бүгін инженерлік әскерлері күні

Осыдан 33 жыл бұрын Қарулы күштерде инженерлік әскерлерді басқару органдарының жүйесі қалыптасты. 

Осы кәсіби мерекеге орай, Қонаев гарнизонындағы 58/012 әскери бөлімінде баспасөз туры ұйымдастырылды.

Ардақ Айбарұлы, тілші:

- Инженерлік-саперлік бригада командирлері бұқаралық ақпарат құралдары өкілдерін алдымен әскери техникамен таныстырды. Мұнда жауды жаңылдыру мақсатында пайдаланылатын үрлемелі техникалар мен түрлі қару-жарақтар қойылған. Ал қашықтан басқарылатын мына құрылғы жарылғыш заттарды жоюға арналған. Ол жауынгерлердің басын қауіп-қатерге тікпеу мақсатында қолданылады.

Қазақстанның инженерлік әскерлері өз еліміз бен шетелдерде ұйымдастырылған түрлі оқу-жаттығулар мен миссияларға жиі қатысады. Олар «Қазбат» бітімгершілік батальонының құрамында болып, жарылмаған оқ-дәрілерді іздестіру, табу, белгілеу және оларды жою жұмыстарын жүргізумен айналысады. Қазақстандық әскери қызметшілердің кәсіби біліктілігі сарапшылар тарапынан әрқашан жоғары бағаланады.

Қанат Тәңірбергенов, инженерлік-саперлік бригада командирі:

- Иракта бейбітшілік тапсырмасын орындау барысында осы бірінші саперлік батальон құрылып, 2003 жылдары Ирак мемлекетінде өз тапсырмаларын орындап келді. Қазіргі таңда да менің осы әскери бөлімімде көптеген сержанттар, офицерлер Ливан мемлекетінде минадан тазалау жұмыстарын жүргізіп жатыр. Көптеген іс-шараларға қатысты десек болады бригада.

Қонаев гарнизонында өткен баспасөз туры барысында миналау, жарылғыш заттарды залалсыздандыру жаттығулары көрсетілді. Журналистер арнайы инженерлік техникалар мен ұшқышсыз ұшу аппараттарынан қорғануға және оларға қарсы шабуылға шығуға арналған әдіс-тәсілдерді де тамашалады.

Бекзат Тұрсынов, қатардағы жауынгер:

- Бізде қазіргі заманда бұрынғыдай дрондармен соғыспайды ғой. Соған қарсы қалай шабуыл жасау керек, соны үйретеміз. Бізде сабақтар апта сайын болып тұрады. Дрондарға, танкіге қарсы осындай сабақтар жиі-жиі өтіп тұрады бізде.

Қонаев гарнизонындағы 58012 әскери бөлімінде қазір 400 сарбаз Отан алдындағы азаматтық борышын өтеп жатыр. Олар құрылғанына биыл 33 жыл толған инженерлік әскер қатарына қабылданғанын мақтан етеді. Ал еліміз бойынша инженерлік-саперлік бригада тек Қонаев гарнизонында ғана бар. 

Авторлары: Ардақ Айбарұлы, Аят Дүйсенбаев, Аманжол Жөңкешов