Бүкіл әлемде YouTube тың плеер интерфейсі жаңарды

Агенттік Android Authority-ге сілтеме жасап хабарлағандай, жаңартулар «таза» әрі түсінікті интерфейс жасауға бағытталған, басқару элементтерінің орналасуы мен визуалдық эффектілер қайта қаралды.

Теледидарларда видео туралы ақпарат жоғарғы сол жақ бұрышқа ауыстырылды, ал барлық басқару элементтері прогресс жолының астында орналастырылған: сол жақта — канал иконкасы, «Сипаттама» және «Жазылу» батырмалары, ортасында — дәстүрлі ойнату/тоқтату батырмасы, оң жақта — «Титрлер» және «Параметрлер». «Ұнады», «Ұнамады», «Пікірлер» және «Сақтау» батырмалары енді біртұтас блокқа біріктірілді.

Мобильді құрылғыларда альбомдық бағытта басқару элементтерінің көпшілігі экранның сол жақ бөлігінде бір блок ретінде орналасты. Сондай-ақ, YouTube стандартты әрекеттерге арналған иконкаларды жаңартты, олар бұрыннан YouTube Music-та қолданылып келеді. Кейбір видеода «Ұнады» батырмасын басқанда қолданушыға арнайы динамикалық визуализация көрінеді: мысалы, музыкалық клиптерде — анимацияланған ноталар, спорттық контентте — ойыннан визуалдық элементтер.

Қос рет басқанда видео жылжуы енді бұрынғыдай қатты көзге түсіп тұрмайды, жұмсақ әрі аз байқалатын болды. Видео сақтау жүйесі жақсарды: «Кейін қарау» немесе плейлисттерге қосу енді көрнекі түрде ыңғайлы әрі жылдам жұмыс істейді. Пікірлерге жауап беру жүйесі енді реттелген түрде ұйымдастырылып, оларды оқуды жеңілдетті.

Мобильді құрылғыларда беттер арасында ауысу motion-дизайнның анимациясы арқылы жақсарды. Жаңартулар осы аптадан бастап әлемнің барлық пайдаланушысына қолжетімді бола бастайды.

Бұған дейін YouTube Трамптың аккаунтын бұғаттағаны үшін шамамен 25 млн доллар төлейтінін хабарлаған едік.