“Бұл сұмдық қашан бітеді?“: Алматыда тозаңның рекордтық деңгейі тіркелді

Аллергияны емдеу әдістерін зерттеумен айналысатын ғалым Қайсар Табынов Алматыдағы тозаң мониторингінің жаңа мәліметтерін жариялады. Профессордың айтуынша, бірнеше күн бұрын қалада жусанға қатысты маусымның жаңа рекорды тіркелген. Толығырақ - Tengri Health материалында.

Мониторинг нәтижесі

Қазақ ұлттық аграрлық зерттеу университетінде әріптестерімен бірге апта сайынғы тозаң мониторингін жүргізетін Қайсар Табынов әлеуметтік желіде Алматыдағы 7-13 қыркүйек аралығындағы жағдай туралы айтып берді.

Ғалымның мәліметінше, қазір қалада жусан мен амброзия тозаңының таралуы қауіпті деңгейге жеткен.

Тозаң мониторингінің нәтижесі. Фото Қайсар Табыновтың әлеуметтік желідегі парақшасынан

Анықтама: Ауадағы тозаң мониторингі - бұл ауа құрамындағы өсімдік тозаңдарының мөлшері мен түрлерін, сондай-ақ зең саңырауқұлақтарының спораларын тұрақты бақылау. Бұл мәліметтер тозаңдану болжамын жасауға, өсімдіктердің гүлдеу кезеңі мен шарықтау шегін анықтауға және аллергиясы бар адамдарға қауіпті кезеңдер туралы ескертуге мүмкіндік береді.

"Сәрсенбі, 9 қыркүйекте, маусымның жаңа абсолют рекорды тіркелді - жусан тозаңы текше метрге 752 дәнге жетті. Бұл бұрынғы ең жоғарғы көрсеткіш - 638 дәннен де асып түсті. Амброзия көрсеткіші текше метрге 839 дән болды - бұл 984-ке тең рекордтан кейінгі екінші нәтиже. Екі көрсеткіш те қауіпті шектен бірнеше есе жоғары", - деп түсіндірді Қайсар Табынов.

Бұл ауаның бір текше метрінде жусанның 752 тозаң дәні мен амброзияның 839 дәні табылғанын білдіреді. Мұндай концентрация өте жоғары болып саналады және бұл өсімдіктерге орташа сезімталдығы бар адамдардың өзінде аллергия белгілерінің қатты қозуына әкеп соғуы мүмкін.

Қайсар Табынов тозаң концентрациясы маңызды екенін айтады.

Қазір ғалымдар тіркеп отырған шектен тыс жоғары көрсеткіштер кезінде, тіпті аллерген-спецификалық иммунотерапиядан (АСИТ) өткен адамдарда да аллергия белгілері байқалуы мүмкін. Бірақ, әрине, олар емге дейінгіге қарағанда әлдеқайда жеңіл өтеді. Ал мұндай ем қабылдамаған алматылықтарға қазір қиынға соғып тұр.

"Былтырғы қыркүйекте ауадағы барлық тозаңның 82 пайызы жусанға тиесілі болса, биыл бұл көрсеткіш небәрі 46,6 пайыз болып отыр. Себебі амброзия оған ілесіп қалды - 41,8 пайыз. Оған қоса, сораңдар тұқымдасы күтпеген жерден белсенділік танытып отыр (5,7 пайыз), бұрын қыркүйекте олар жоқтың қасы еді. Үш өсімдік бірге барлық тозаңның 94 пайызын беріп тұр. Биылғы аллергендер жиынтығы мүлдем басқа, сондықтан қазір көптеген адамға өте ауыр соғып жатыр", - деп есептейді сарапшы.

Аллергиясы бар жандар әлеуметтік желілерде: "Бұл сұмдық қашан бітеді?" - деп сұрап жатыр.

Табыновтың пайымдауынша, белсенді тозаңдану кезеңі қыркүйектің аяғында немесе қазанның басында бәсеңдеуі мүмкін.

"Бірақ бұл маусым былтырғыдан өзгеше, сондықтан дөп басып айту қиын", - деп ескертті ол.

Дәрігерлер аллергиясы бар адамдарға мүмкіндігінше сыртта аз болуды, әсіресе таңғы 8-ден күндізгі 12-ге дейін далаға шықпауды, респиратор (немесе маска) мен көзілдірік тағуды, үйде терезені жауып, ауа тазартқыш қолдануды ұсынады.

Бізді Google-дың негізгі дереккөздер тізіміне қосыңыз

Алматы

Қазақстан

аллергия