Шымкент әуежайында жаңа ұшу қону жолағы қашан салынып бітеді

Шымкент әуежайында жаңа ұшу-қону жолағының құрылысы 2025 жылдың қыркүйек айынан бері жалғасып келеді. Қалалық жолаушылар көлігі және автомобиль жолдары басқармасы Tengri Travel-ге жаңа ұшу-қону жолағының қандай болатынын, жобаның құны қанша екенін, оны қашан аяқтау жоспарланғанын және қолданыстағы жолақтың тағдыры не болатынын айтып берді.

Басқарманың мәліметінше, жоба ұзындығы 3 900 метр және ені 75 метр болатын жаңа жасанды ұшу-қону жолағының құрылысын қарастырады. Сондай-ақ екі жағынан ені 15 метрлік нығайтылған жиектер болады.

"Аэродром жабындарының конструкциясы Қазақстанның авиациялық ережелері мен азаматтық авиация саласындағы халықаралық стандарттардың талаптарына сәйкес әзірленді", - деп атап өтті ведомство.

Нысан пайдалануға берілгеннен кейін әуежай әртүрлі кластағы әуе кемелерін, соның ішінде Boeing 777 сияқты кең фюзеляжды жолаушылар ұшақтары мен ауыр жүк борттарын қабылдай алады.

Құрылыс жұмыстары 2025 жылдың қыркүйегінде басталды.

Қазір нысанда негізді дайындау, ұшу-қону жолағы мен такси жолдарын төсеу, сондай-ақ инженерлік коммуникацияларды жүргізу жұмыстары жүріп жатыр.

Жобаның жалпы сметалық құны 46 миллиард теңгені құрайды. Қаржыландыру республикалық және жергілікті бюджеттер есебінен жүргізіліп жатыр.

Құрылысты 2028 жылы аяқтау жоспарланған. Басқарма нақтылағандай, мерзімдер жоба уақтылы қаржыландырылған жағдайда есептелген.

Жаңа ұшу-қону жолағы іске қосылғаннан кейін қазіргі қолданыстағы жолақ та пайдаланыла береді.

"Қолданыстағы жасанды ұшу-қону жолағы жаңа жолақ пайдалануға берілгеннен кейін де өзінің функционалдық мақсатын сақтап, қолданыла береді. Оны одан әрі пайдалану тәртібін азаматтық авиация саласындағы уәкілетті мемлекеттік органдар авиациялық қауіпсіздік талаптарын, қолданыстағы нормативтерді және әуежайдың даму перспективаларын ескере отырып айқындайды", - деп хабарлады ведомство.

Ведомствоның бағалауынша, екі жолақтың болуы әуежай жұмысын тоқтатпай, оның біреуінде жөндеу жұмыстарын жүргізуге мүмкіндік береді, сондай-ақ өткізу қабілетін арттыруға және маршруттық желіні дамытуға жағдай жасайды.

Тағы оқыңыз: Баянауыл әуежайы салынды, бірақ әлі ашылмады. Неге?

Google News арқылы жаңалықтарымызды қадағалаңыз