Павлодар әуежайының ұшу қону жолағы жаңғыртылып жатыр

Павлодар әуежайының ұшу-қону жолағын жаңғырту жұмысы қайта жанданды.

Бұған дейін әуежай 7 айға жабылып, құрылыс басталғанымен кейін тоқтап қалды. «Себебі қаржы тапшылығы болды», - дейді мамандар. Енді қайтарылған заңсыз активтер есебінен жөнделетін болды. Үкімет  жобаға 9,3 млрд теңге қаржы  бөлді.  Жолақ 45 метрден 60 метрге дейін кеңейтіледі. Заманауи жарықтандыру, бейнебақылау және дренаж жүйелері орнатылады. Қазір жұмыстың 47 пайызы бітіп тұр. Жобаның құны – 16,4 млрд теңге. 

Нариман Омар,  Жолаушылар көлігі және автомобиль жолдары басқармасы басшысының орынбасары:

- Павлодар әуежайының ұшу-қону жолағын  жаңарту жұмыстары келесі жылдың шілде айында аяқталады. Бұл мақсатқа 9,3 миллиард теңге көлемінде қаржы бөлу туралы шешім қабылданды. Бүгінгі таңда барлық тиісті шарттар жасалып, қазынашылық органдарында тіркелді. Бұл үрдіс жұмыс қарқынын жеделдетуге мүмкіндік береді.