Атырауда күкіртсутектің жоғары деңгейі тіркелді

Қалада таң құстардың әуенімен басталғанымен, ауаның иісі көңілге қаяу салды. Көптеген тұрғындар түнде терезелерін ашық қалдырғанына өкінді. Кеше жауған жаңбырдан кейін ауа шаң мен ұсақ бөлшектерден тазарғандай көрінгенімен, таңертең қайтадан «шіріген жұмыртқаның» иісі сезілді.

Air.kz бақылау бекеттерінің дерегінше, «Шағала» ауданында күкіртсутек (H₂S) концентрациясы 60,6 ШРК, ал «Восток» бекетінде 52,3 ШРК деңгейіне жеткен. Дәл осы газдың иісі «шіріген жұмыртқаға» ұқсайды.

Басқа ластаушы заттар — азот оксиді, күкірт диоксиді және көміртек тотығы нормадан аспаған немесе орташа деңгейде болған. Алайда күкіртсутектің жоғары көрсеткіші ауаның сапасына айтарлықтай әсер етуде.

Экология департаменті мамандары ауа сынамаларын алып, зертханалық талдау жүргізіп жатқанын хабарлады.

Сонымен қатар, IQAir қосымшасы сияқты басқа мониторинг қызметтерінде де ұсақ дисперсті шаңның бар екені көрсетілген.

Айнұр САПАРОВА

Бүгін, 12:30