Бюджет 2028 жылға дейін бекітілді Зияткерлік мектептердегі орындар не болмақ

Келесі жылы Назарбаев зияткерлік мектептеріне (НЗМ) қабылдауды қысқарту жоспарланып отырған жоқ. Бұл туралы Үкіметте өткен брифингте оқу-ағарту министрі Жұлдыз Сүлейменова айтты, деп хабарлайды Tengri Education.

Министрден бұл мектептерді қаржыландыруды қысқарту туралы әңгімелер аясында НЗМ-ге түсуге дайындалып жүрген қазіргі алтыншы сынып оқушыларына алаңдауға негіз бар-жоғын сұрады.

Сүлейменова қазіргі уақытта гранттар санын немесе оқушы орындарын қысқарту мәселесі қарастырылып жатпағанын айтты.

"Қабылдауды қысқартуға келетін болсақ - жоқ, ондай мәселе тұрған жоқ. Неге? Өйткені үш жылдық бюджет бекітілді, 2028 жылға дейінгі НЗМ бюджеті мақұлданған", - деді министр.

Оның айтуынша, қабылданатын оқушылар саны мектеп бітірушілердің санына байланысты болады.

"Гранттар немесе оқушы орындары қысқартылады деген мәселе жоқ. Бәрі бұрынғыдай қалады. Ең бастысы - түлектер саны қанша болады. Сол түлектердің орнына дәл сондай мөлшерде балалар келеді. Мысалы, төрт бітіруші сынып болса, демек төрт сыныпқа қабылдау жүргізіледі", - деп түсіндірді Сүлейменова.

Бұл ретте министр НЗМ-ге қатысты тәсілді, олардың білім беру тәжірибесін қарапайым мектептерге тарату тұрғысынан қайта қарау жоспарланып отырғанын айтты.

"Қазір зияткерлік мектептердің жинақталған озық тәжірибесін жалпы білім беретін басқа барлық мектепте нақты таратудың уақыты келді", - деді ол.

Жұлдыз Сүлейменованың өзі көп жыл НЗМ жүйесінде жұмыс істеген. Әр жылдары ол білім беру саясаты және бағдарламалар департаментінде қызмет атқарды, даму департаментін басқарды, сондай-ақ Алматыдағы физика-математика бағытындағы НЗМ директоры болды.

2024 жылы Жоғары аудиторлық палата 2019–2023 жылдар аралығында НЗМ бюджеттен 250 миллиард теңге алғанын, оның 22 миллиардтан астамы тәжірибе таратуға жұмсалғанын хабарлады. Аудиторлар 8,3 миллиард теңге тиімсіз жоспарланғанын және 6 миллиард теңгеге жуық қаражат тиімсіз пайдаланылғанын мәлімдеп, сұралатын бюджеттік қаржыландыруды неғұрлым қатаң негіздеуді талап етті.

Тағы оқыңыз: Қазақстанда 12 жылдық оқудан бас тарту мәселесі қарастырылып жатыр: комиссия құрылды

Google News арқылы жаңалықтарымызды қадағалаңыз