Диас Досқараев: Е. Рыбакинаның жеңісіне қатысты пікір білдірді

Әлемдік рейтингте бесінші болып тұрған Қазақстан теннисшісі Елена Рыбакина Австралия-2026 ашық біріншілігінде алғаш рет жеңіске жетті. Ол әлемдік рейтинг көшін бастап тұрған беларус Арина Соболенкодан басым түсті. Қорытынды есеп: 6:4, 4:6, 6:4.  

Финал Рыбакина үшін сәтті басталды. Алғашқы сетте ол 6:4 есебімен алға шықты. Дәл осындай есеппен екінші партияда Соболенко қарымта қайтарды. Шешуші кезеңде Елена салқынқандылық танытып, шеберлігін паш етті. Беларусь қызы қатарынан үш геймде басымдық танытып, алға шыққан еді. Алайда Рыбакина сасқан жоқ. Қатарынан бес геймді өз пайдасына шешіп, таразы басын бері аударды. Кейін матчқа әдемі нүкте қойды. 

Жерлесіміз үш жыл бұрынғы есесін қайтарды. 2023 жылы жасыл құрлықтағы дәл осы сайыстың финалында Беларусь қызының мерейі үстем болған еді. Рыбакина осы жетістігінен кейін әлемдік рейтингте үшінші орынға көтеріліп, 2 млн 793 мың АҚШ долларын құрайтын қаржы тапты. 

Елена Рыбакина, Australian Open чемпионы:

- Әрине сіздерге осындай керемет көңіл-күй сыйлағандарыңыз үшін алғыс айтам. Нағыз шайқас болды. Шынымды айтсам, сіздердің қолдауларыңыз бізді алға жетеледі. Әсіресе Қазақстанға алғысым шексіз. Маған негізгі қолдау сол жақтан болды.

Жалпы бұл Соболенконың Australian Open финалындағы екінші жеңілісі. Былтыр ол америкалық Мэдисон Кизге есе жіберген. Ал оған дейінгі екі жылда Соболенко үздік болып еді.

Арина Соболенко, Әлемнің бірінші ракеткасы:

- Рақмет. Әрине әрқашан қасымда болғандарыңыз, финалда жеңілгенімді көргендеріңіз үшін командама рақмет айтамын. Алайда кейде біз жеңеміз, сондықтан жақсылықтан үміт үзбейік. Келесі жылы жүлде біздікі болады деп сенемін.

Жалпы бұл 26 жастағы жерлесіміздің «Үлкен дулыға» жарыстарындағы екінші жүлдесі. Рыбакина 2022 жылы Уимблдонда топ жарған болатын.

Диас Досқараев, Қазақстан теннис федерациясының вице-президенті:

- Негізі бұл тарихи нәтиже. Әлемдегі көптеген сарапшылар бұл жеңісті күткен сияқты. Өйткені барлығы білді. Елена Рыбакинаның деңгейін, өзін қалай ұстайтынын, психологиясын. Уимбилдонда 2022 жылы ұтқанда көптеген сарапшылар осы ойыншы әлі жетістікке жетеді деп айтқан. Сондықтан біз әрине өте қуаныштымыз. 

Биылғы Австралия ашық біріншілігі біз үшін тарихи сәттерге толы. Жұптық сында Анна Данилина финалға шықты және Заңғар Нұрланұлы жасөспірімдер арасында жартылай финалға дейін жетті. 

Авторы: Ернат Рахметолла