Дубайда алғашқы коммерциялық әуе такси станциясы салынды

Дубай халықаралық әуежайы маңында орналасқан жаңа кешеннің аумағы — 3000 шаршы метр.

Төрт қабатты ғимаратта тік ұшып-қонатын электр әуе аппараттарына (eVTOL) арналған екі арнайы ұшу-қону алаңы және автотұрақ қарастырылған.

Станция жылына 170 мың жолаушыға қызмет көрсете алады. Әуе такси арқылы коммерциялық тасымалдарды іске қосу 2026 жылдың соңына жоспарланған.

Бұл жоба қалалық әуе мобильділігін дамыту бағдарламасының бір бөлігі. Алғашқы кезеңде төрт вертипорттан (әуе такси станцияларынан) тұратын желі құру жоспарланған: әуежайдағы нысаннан бөлек, қала орталығында, Palm Jumeirah аумағында және Dubai Marina ауданында станциялар пайда болады.

Жаңа жүйе қала ішіндегі қозғалыс уақытын айтарлықтай қысқартады. Мысалы, әуежайдан Palm Jumeirah-ға дейінгі ұшу шамамен 10 минутты алады, ал автокөлікпен бұл жол шамамен 45 минутқа созылады.

Кешен заманауи инфрақұрылыммен жабдықталған, оның ішінде электр әуе аппараттарын зарядтау станциялары және екі деңгейлі автотұрақ бар.

Дубай билігі бұл нысанды «өз түріндегі алғашқы жоба» деп атап, болашақтың тұрақты әрі жоғары технологиялы көлік жүйесін қалыптастырудағы рөлін ерекше атап өтті.

Еске сала кетейік, Алматы мен Алатау қалаларында әуе таксиі іске қосылады.