Елде 1800 ден астам стартап бар

Қазақстан венчурлық қорлардың экожүйесін қалыптастыру жөнінен Орталық Азияда көш бастады. Бүгінде елімізде 1838 стартап тіркелген. Traxcn.com платформасының мәліметінше, 1400-ден астамы 18 венчурлық қордан қолдау тапқан. Демеу қаржының көлемі 61,5 млрд доллардан асады. Айта кетерлігі, АҚШ, Нидерланды, Сингапур венчурларынан бөлек, қазақстандық инвесторлар да табысты стартапқа қаржы құйып жатады. Осы ретте IT саласын жете түсінетін әрі пайда көргісі келетіндердің инвестор тартып, жеке венчурлық қор ашуы жиіледі. Мәселен, былтыр Астана хабтың өзінен венчурлық қор ашылған еді. Бұл қор Орталық Азиядан бөлек, Әзербайжан мен Моңғолияның ІТ компанияларына қолдау көрсетеді. Бүгінде 8 стартапқа қаржы құйған. 

Айдана Бергазденова, Astana Hub Ventures бас директоры:

- Біз ерте кезеңдегі стартаптарды қолдағандықтан, стартаптардың қолдау чегі 50 мың доллардан 500 мың долларға дейін жетеді. Яғни олардың деңгейіне байланысты. Егер жас, енді ғана бастап жатқан идея, прототип түріндегі стартап болса, онда 50-100 мың доллар көлемінде инвестиция береміз. Егер одан бөлек дамыған, қазіргі кезде трекшн көрсеткен, яғни сатылымдары бар стартап болса, оларға әрине, чектің көлемі өзгеше болуы мүмкін.