Елжас Отыншиев ҚТЖ басқарма төрағасы болды

Елжас Отыншиев "Қазақстан темір жолы" (ҚТЖ) ұлттық компаниясының басқарма төрағасы болып тағайындалды. Бұл туралы "Самұрық-Қазына" қоры хабарлады, деп хабарлайды Tengrinews.kz тілшісі.

"Самұрық-Қазына" АҚ басқармасының шешімімен Елжас Мұратұлы Отыншиев "Қазақстан темір жолы" ҰК" АҚ басқарма төрағасы лауазымына тағайындалды", - делінген хабарламада.

Елжас Отыншиев Мәскеу физика-техникалық институтының бакалавриаты мен магистратурасын "жалпы және қолданбалы физика" мамандығы бойынша бітірген.

Еңбек жолын 2007 жылы Ernst & Young компаниясының Мәскеудегі кеңсесінде бизнесті бағалау және мәмілелерді сүйемелдеу департаментінің кеңесшісі болып бастады.

2009-2019 жылдар аралығында "Самұрық-Қазына" АҚ және оның еншілес компанияларында жұмыс істеді.

2021-2023 жылдары KIDF-те басқарушы лауазымдарда қызмет етіп, инвестициялық портфельді басқаруға жетекшілік етті.

2023 жылдың сәуір айынан бастап қазіргі уақытқа дейін "Самұрық-Қазына" АҚ стратегия және активтерді басқару жөніндегі басқарушы директоры – басқарма мүшесі қызметін атқарды. Бұл лауазымда қордың мұнай-газ, теміржол, тау-кен және басқа да секторлардағы портфельдік компанияларын басқаруға жауапты болды.

2024 жылдың ақпанынан бастап "Қазақстан темір жолы" ҰК" АҚ директорлар кеңесінің мүшесі.

2023 жылы Қазақстан Республикасының мемлекеттік наградасы – "Ерен еңбегі үшін" медалімен марапатталды.

Еске сала кетейік, бұған дейін Талғат Алдыбергенов "ҚТЖ" ұлттық компаниясының басқарма төрағасы қызметінен кеткен болатын. Кейін ҚТЖ басқарма төрағасының міндетін атқарушы болып Бауыржан Орынбасаров тағайындалды.

Google News арқылы жаңалықтарымызды қадағалаңыз