Ең жоғары нәтиже 131 балл : Ұлттық бірыңғай тестілеудің алғашқы нәтижесі белгілі болды

10 қаңтарда басталған Ұлттық бірыңғай тестілеуді (ҰБТ) бүгінгі күнге дейін 36 мыңнан астам талапкер тапсырды, – деп хабарлайды Aikyn.kz сайты.

Тестілеуге қатысқандардың 64%-ы ҰБТ-ны қазақ тілінде, 36%-ы орыс тілінде, ал 52 талапкер ағылшын тілінде тапсырған.

Бірінші аптаның қорытындысы бойынша талапкерлердің 60,3%-ы шекті балл жинаған. Бес пән бойынша орташа балл – 57, ал ең жоғары нәтиже 131 балды құрады.

Сондай-ақ ерекше білім беру қажеттіліктері бар талапкерлер үшін жасалған қолайлы жағдайлардың арқасында 156 оқуға түсуші ҰБТ-ға қатысқан.

Талапкерлер тест тапсырмаларының мазмұны бойынша тестілеу аяқталғаннан кейін 30 минут ішінде апелляцияға өтініш бере алады. Ал техникалық себептерге байланысты апелляциялар тікелей тестілеу барысында қабылданады. Апелляция нәтижелері қаралғаннан кейін сертификаттар талапкерлердің жеке кабинеттерінде қолжетімді болады.

ҰБТ-ның алғашқы аптасында 94 ереже бұзушылық тіркелді. Оның ішінде 56 талапкер смартфон, шпаргалка және өзге де тыйым салынған заттарды алып кірмек болғаны үшін тестілеуден шеттетілді. Ал 38 адам тестілеу кезінде ережелерді бұзғаны үшін аудиториядан шығарылып, олардың нәтижелері жойылды. Өзге адамның орнына кіру фактілері анықталған жоқ.

2026 жылғы ҰБТ аяқталғаннан кейін 31 қазанға дейін бейнежазбаларға талдау жүргізіледі. Тыйым салынған заттарды пайдалану немесе ережелерді бұзу деректері анықталған жағдайда ҰБТ нәтижелері жойылады.

Айта кетейік, биыл ҰБТ-ға қатысу үшін 187 мыңға жуық өтініш келіп түскен.