Енді несие алу оңайға соқпайды

24 қарашадан бастап елімізде тұтынушылық несиелерді рәсімдеу тәртібі қатаң болып, бірқатар өзгеріс енбек, – деп хабарлайды Aikyn.kz сайты.

Ұлттық банк қарыз алушылар үшін тәуекелдерді басқару және ішкі бақылау жүйесіне қатысты жаңа ережелер енгізіп отыр.

Ең маңызды өзгерістердің бірі қарыз жүктемесінің коэффициенті қайта қаралды. Енді соңғы 12 ай ішінде 90 күннен астам мерзімі өткен берешегі бар азаматтар үшін коэффициент 0,5-тен 0,25-ке дейін төмендейді. Бұл шара азаматтардың шектен тыс қарыз жүктемесін алуына жол бермей, қайта дефолтқа түсу қаупін азайтуға бағытталған.

Сондай-ақ кепілсіз тұтынушылық несиелерге қатысты бірнеше жаңа шектеу енгізіледі. Мұндай несие төмендегі жағдайларда берілмейді:

- банк несиелері бойынша 30 күннен астам, микрокредиттер бойынша 1 күннен астам кешіктірілген қарыз болса;

- 2025 жылғы 1 шілдеден кейін негізгі қарыз немесе сыйақы толық кешірілген жағдайлар соңғы 36 айда тіркелген болса;

- соңғы 12 айда жүргізілген қарызды қайта құрылымдау шаралары нәтижесіз болса.

Мұндай шектеулер несие нарығындағы тұрақтылықты қамтамасыз етуге және қаржылық жауапкершілікті арттыруға бағытталған.