ЕО жаңа санкция пакетін жариялады: қазақстандық компани қара тізімге енді

23 сәуірде Еуропа одағы Ресейге қарсы санкциялардың 20-пакетін жариялады.
Шектеу шаралары аясында Қазақстанда тіркелген United Trading Group компаниясы да санкциялық тізімге енгізілді.

ЕО мәліметінше, аталған компанияның негізін қалаушы – Әлімжан Беков. Компания Германиядағы UrSeCo Handels GmbH & Co. KG ұйымымен байланыс орнатып, Ресейге жоғары сапалы хлорлы сутек (HCl) жеткізумен айналысқан. Бұл химиялық зат жартылай өткізгіш өндірісінде қолданылады.

Еуроодақ құжаттарында көрсетілгендей, өнім Германиядан жеткізіліп, Польша, Түркия, Қазақстан арқылы Ресейге жөнелтілген. Нәтижесінде ЕО тарапы қазақстандық компанияны санкцияларды айналып өтуге ықпал етті деп айыптап отыр.

Айта кетейік, бұған дейін де бірқатар қазақстандық кәсіпорындар ЕО-ның шектеу тізіміне енген. Атап айтқанда, 2025 жылғы 16-пакет аясында «Kazstanex» пен «МеталлСтан», ал 2024 жылы «Da Group 22» және «Elem Group» компанияларына санкциялар салынған болатын.

Сарапшылардың пікірінше, мұндай жағдайлар Қазақстан компаниялары үшін сыртқы нарықтағы тәуекелдерді арттырып, халықаралық әріптестікке қосымша талаптар қоюы мүмкін.