Ерлі зайыптылар бір бірінің банктік шоттары туралы біле ала ма: бұл мәселе Конституциялық Сотқа жетті

Конституциялық Сот ерлі-зайыптылардың банк құпиясына қол жеткізу мәселесін қарайды. Азаматшаның өтініші негізінде Конституциялық Сот «Қазақстан Республикасындағы банктер және банк қызметі туралы» Заңының 50-бабы 4-тармағының Қазақстан Республикасының Конституциясына сәйкестігін тексереді. 

Аталған нормаға сәйкес, банк құпиясын құрайтын мәліметтер тек клиенттің өзіне немесе шот (мүлік) иесінің келісімімен үшінші тұлғаға ғана ашылуы мүмкін.

Азаматша көрсетілген ереже іс жүзінде ерлі-зайыптылардың бірінің ортақ жинақтар туралы ақпарат алу мүмкіндігін шектейді және ерлі-зайыптылардың ортақ мүлкіндегі үлеске құқықты іске асыруға кедергі келтіреді деп есептейді. 

Өтініште көрсетілгендей, некені бұзғаннан кейін ортақ мүлікті бөлу туралы талап-арыз дайындау барысында өтініш беруші бұрынғы жұбайының неке кезеңінде жинақтаған қаржылық қаражаты туралы мәліметтерді ала алмаған. 

Осыған байланысты ол екінші деңгейдегі банктерге қатысты тиісті ақпаратты ұсыну міндетін жүктеу туралы талап-арызбен сотқа жүгінген. Алайда сот талаптарды қанағаттандырудан бас тартқан.

Отырысқа өтініш иесі мен оның заң консультанты, Парламент Палаталарының, Бас прокуратураның, Ұлттық Банктің, Қаржы нарығын реттеу және дамыту агенттігінің, Әділет министрлігінің, Заңнама және құқықтық ақпарат институтының, сондай-ақ Парламентаризм институтының өкілдері қатысты. Баяндамашы судья: Қ.С. Мусин.

Конституциялық Соттың қорытынды шешімі Конституциялық заңның 65-бабына сәйкес КС ресми сайтында сілтеме бойынша, «Егемен Қазақстан» және «Казахстанская правда» газеттерінде жарияланады.  

Бүгін, 10:59