Ет өндірісі мен экспорт көлемін екі есеге арттыру көзделген кешенді жоспар мақұлданды

Премьер-министр Олжас Бектенов Мемлекет басшысының тапсырмасы бойынша әзірленген мал шаруашылығын дамытудың 2026-2030 жылдарға арналған кешенді жоспарының жобасын қараған жиын өткізді.

Жоспарда мал басын көбейту, өнімділікті арттыру және экспорттық әлеуетті кеңейтуге бағытталған мемлекеттік қолдау шаралары қарастырылған. Ауыл шаруашылығы министрлігінің дерегінше, мал шаруашылығы ауыл шаруашылығы жалпы өнімінің 39%-ын құрайды. Соңғы жылы ірі қара мал басы 2,4%-ға, ұсақ мал 1,6%-ға өскен. Сүт өндірісі 5%-ға артып, 3,8 млн тоннаға жетсе, ет өндірісі 1,2 млн тоннаға жетіп, өткен жылғы деңгейден 2,6%-ға жоғары болды.

Кешенді жоспарды іске асыру нәтижесінде ірі қара мал саны 12 млн басқа, ұсақ мал саны 28 млн басқа дейін ұлғаймақ. Ет өндірісі 1,8 млн тоннаға жетіп, экспорт көлемі екі есеге артып, 165 мың тоннаға дейін ұлғаюы күтілуде.

Ауыл шаруашылығы министрі Айдарбек Сапаров асыл тұқымды мал сатып алуға жылдық 6% жеңілдікпен несие беру, шалғайдағы мал шаруашылығын дамытуға 50 млрд теңге қаржыландыру, мал азығын дайындау техникасына қосымша 50 млрд теңге бөлу және айналым қаражатын толықтыру үшін 225 млрд теңге көлемінде жеңілдетілген кредиттеу бағдарламасын іске қосу жоспарланғанын айтты.

Жоспарда кадрлық қамтамасыз ету, шопандар мен бақташыларға әлеуметтік төлемдер беру, тұрғын үй салу, маркетингтік инфрақұрылымды дамыту, ветеринариялық қауіпсіздікті күшейту және жерді тиімді пайдалану мәселелері қамтылған.

Жиын қорытындысында Үкімет кешенді жоспарды мақұлдап, Ауыл шаруашылығы министрлігіне барлық шаралардың сапалы орындалуын қамтамасыз ету тапсырылды.

Бүгін, 13:42