Еуропа автоөндірісі тоқтай ма?

Еуропадағы көлік шығарушы алпауыт компаниялар өндіріс тоқтап қалуы мүмкін екенін ескертті.

Таяуда Қытай үкіметі чип өндіруші «Nexperia» компаниясының кей өнімдерін экспорттауға шектеу қойды. Салдарынан Еуропаға жеткізу тізбектері үзіліп, көлік нарығына әсер етіп отыр. 

Микрочип жасақтауда көшбасшы саналатын «Nexperia»-ны 2018 жылы қытайлық Wingtech Technology корпорациясы сатып алған еді. Биыл қыркүйек айының соңында Нидерланд үкіметі ұлттық қауіпсіздік заңына сүйеніп, Nexperia-ның қызметіне уақытша бақылау орнатты. Олар технологиялардың Қытайға берілуінен қауіптенген. Бұған жауап ретінде Қытай билігі компанияның қытайлық бөлімшелері шығаратын кей компоненттердің экспортын шектеді. Еуропа автонарығындағы чип тапшылығы осыдан пайда болды. Бүгінде Volkswagen мен BMW сынды ірі компаниялар көлік шығаруға қажетті чиптер қорының қанша уақытқа жететінін нақты айта алмай отыр. Бірақ қазірдің өзінде олар балама жеткізуші көзін іздеуде. Кәсіпорын өкілдері пандемия кезіндегі чип тапшылығы қайталануы мүмкін дейді.

Беатрикс Кайм, «Car» компаниясының қытайдағы бизнес пен жобалар жөніндегі директоры:

- Nexperia чиптері Еуропадағы барлық ірі автоөндірушілерге жеткізіледі. Бұл микросхемалардың құрылымы күрделі емес, бірақ онсыз көлік құрастыру мүмкін емес. Қазір көлік шығаратын зауыттардың жұмысы тоқтау қаупінде.

Автокомпаниялар мұндай чиптерді әдетте бір-екі айға жететін көлемде ғана сатып алады, өйткені қоймада артық сақтау шығынды. Сондықтан кез келген кідіріс өндірістің тұралауына әкелуі мүмкін. Ал балама жеткізушіге көшу оңай емес. Көліктің әр бөлшегі жеке сертификаттаудан өтеді, бір компонентті ауыстырудың өзі апталар, кейде айлар алады. Оның үстіне жаңа өндірушілерге шикізат табу, өндіріс көлемін арттыру, баға белгілеу сияқты мәселелерді шешуге де уақыт керек.

Беатрикс Кайм, «Car» компаниясының қытайдағы бизнес пен жобалар жөніндегі директоры:

- Еуропа елдерінің үкіметтері Қытаймен тікелей келіссөз жүргізуі тиіс. Бұл мәселе тек саяси және дипломатиялық жолмен шешіледі. Әйтпесе соққы бүкіл өнеркәсіпке тиеді. 

Сарапшылардың айтуынша, жағдай жақын арада реттелмесе, бұл тек автоөндіріс емес, жалпы еуропалық өнеркәсіп пен электроника саласына да әсер етеді. Нарықта көлік азайып, бағасының шарықтап кетуі де ғажап емес.

Әйгерім Ардаққызы