Еуропалық одақ бейсенбіде Ресейге қарсы санкциялардың 20 пакетін түпкілікті бекітеді

АСТАНА, 23 сәуір – Sputnik. Еуропалық одақ елдері бейсенбі күні Ресейге қарсы санкциялардың 20-пакетін түпкілікті бекітуді жоспарлап отыр.

Бұл пакетке жаңа экспорттық-импорттық шектеулер, сондай-ақ жекелеген жеке тұлғалар мен ұйымдарға қатысты шаралар енгізіледі.

ЕО елдерінің тұрақты өкілдері жаңа санкцияларды алдын ала келісіп алды. Бұған дейін оны ұзақ уақыт бойы бұғаттап келген Венгрия шешімін өзгерткен. Осыдан кейін министрлік деңгейінде пакетті түпкілікті бекіту үшін техникалық жазбаша рәсім басталды.

Еуропалық ақпарат көздерінің мәліметінше, бұл рәсім бейсенбі күні түстен кейін аяқталады. Одан кейін бекітілген шаралар ЕО-ның ресми журналында жарияланып, күшіне енеді.

Бұған дейін Еуропалық комиссия Ресейге қарсы 20-санкциялар пакеті бойынша ұсынысын ресми түрде таныстырған болатын. Оны ақпан айының соңына дейін енгізу жоспарланған, алайда Венгрия Украина арқылы өтетін "Дружба" мұнай құбырымен жеткізілімдердің тоқтауына байланысты бұл шешімді бұғаттады.

Кейін венгриялық MOL мұнай-газ компаниясы Украина Венгрия мен Словакияға "Дружба" арқылы мұнай жеткізуді қайта бастауға дайын екенін хабарлағанын мәлімдеді.

Алғашында Еуропалық комиссия 20-пакет аясында Ресейдің энергетикалық секторына қарсы санкцияларды айтарлықтай күшейтуді көздеген. Атап айтқанда, ресейлік мұнайды теңіз арқылы тасымалдауға шектеулер енгізу, мұнай танкерлеріне қызмет көрсетуге тыйым салу және мұнай тасымалдайтын кемелерге қарсы санкцияларды кеңейту ұсынылған. Алайда Таяу Шығыстағы қақтығыс аясында ЕО-дағы энергетикалық дағдарыстың күшеюіне байланысты БАҚ-та бұл шаралардың бір бөлігі пакеттен алынып тасталуы мүмкін деген ақпарат тарады.

Энергетикадан бөлек, жаңа пакетте жекелеген банктерге, соның ішінде үшінші елдердегі қаржы ұйымдарына және криптосервистерге қатысты шектеулер енгізу жоспарланып отыр. Экспорттық шектеулер қосарлы мақсаттағы компоненттерге, әсіресе ұшқышсыз ұшу аппараттарын (дрондарды) өндіруге пайдаланылуы мүмкін тауарларға қатысты кеңейтіледі. Ал импорттық шектеулер бірқатар метал мен химиялық заттарды қамтиды.

Сондай-ақ "жеке санкциялар" тізімі де кеңейтіледі – оған енген тұлғаларға ЕО аумағына кіруге тыйым салынып, олардың Еуропадағы активтері бұғатталады.

Жалпы, Еуропалық одақ Ресейге қарсы бұған дейін 19 санкция пакетін қабылдаған. Шектеулерге екі мыңнан астам жеке тұлға мен ұйым іліккен. Санкциялар Ресейдің қаржы, көлік және энергетика секторларын, сондай-ақ сыртқы саудасын қамтиды.

Ресей санкциялық қысымға төтеп бере алатынын бірнеше рет мәлімдеді.