Fitch Ratings Отбасы банктің рейтингін BBB деңгейінде растады

Фото: «Отбасы банк»

Рейтингтің расталуы банктің қаржылық жағдайының орнықтылығын, активтер сапасының жоғарылығын, тұрақты қорландыру базасын және Қазақстандағы тұрғын үй қаржыландыру жүйесін дамытудағы жүйе құраушы рөлін көрсетеді.

«Қазіргі таңда «Отбасы банкте» 4 миллионнан астам депозит ашылған. Олардың әрқайсысының артында өз баспанасына қол жеткізуді мақсат еткен отбасылардың сенімі тұр. Біз үшін Fitch рейтингі – банктің қаржылық тұрақтылығының, бизнес-моделіміздің тиімділігінің және салымшылар тарапынан көрсетілген жоғары сенімнің тәуелсіз халықаралық растауы. Ұлттық даму институты ретінде біз тек қаржылық міндеттерді ғана емес, сонымен қатар тұрғын үйді ашық әрі әділ бөлуді қамтамасыз ететін маңызды мемлекеттік миссияны да атқарып келеміз. Процестерді цифрландырудың арқасында соңғы бір жылда тұрғын үйді бөлу көлемі үш есеге артты, ал тұрғын үйге мұқтаж ретінде есепте тұрған 21 906 азамат қоныс тойын атап өтті», деді «Отбасы банктің» басқарма төрағасы Ләззат Ибрагимова.

Sustainable Fitch «Отбасы банкінің» тұрақты даму рейтингін көтерді

2026 жылдың бірінші жартыжылдығында «Отбасы банкте» 485 252 азамат жаңа депозит ашты. Бұл өткен жылдың сәйкес кезеңімен салыстырғанда 21,9%-ға көп.

Жаңа салымшылар санының өсуі болашақта «Отбасы банкте» жинақталған қаражаттың азаматтарға жылдық 3,5%-дан бастап (ЖТСМ 3,6%-дан 4,4%-ға дейін) қолжетімді мөлшерлемемен ипотека алуға мүмкіндік беруімен байланысты.

Банктің халықтың ұзақ мерзімді салымдарындағы үлесі 39% құрайды. Клиенттердің жинақ шоттарында 3,3 трлн теңге жиналған.

«Отбасы банктің» көмегімен күн сайын 320 азамат тұрғын үй қарызын алып, қоныс тойын тойлап жатыр. Елдегі ипотекалық портфельдегі банктің үлесі 55% құрайды. Жыл басынан бері 43 687 қолжетімді қарыз берілді.

2025 жылы Отбасы банкінің әрбір үшінші клиенті өмірінде алғаш рет өз баспанасына ие болды

Банк сондай-ақ екінші деңгейлі банктер арасында кредиттік портфель сапасы бойынша үздік көрсеткіштердің бірін көрсетіп отыр. 90 күннен астам мерзімі өткен берешегі бар кредиттердің үлесі (NPL 90+) – 0,14%, ал банк секторындағы орташа көрсеткіш 4,19% деңгейінде.

«Отбасы банк» активтері бойынша 4-орынға көтерілді. Сонымен қатар меншікті капиталы бойынша қазақстандық екінші деңгейлі банктер арасында 6-орында тұр.

Бүгінде «Отбасы банктің» қолдауы мен тұрғын үй құрылыс жинақтары жүйесінің сенімділігінің арқасында 679 644 отбасы өз баспанасында тұрып жатыр.