Футболдан әлем чемпионаты: Трамп кеңесшісі Иранды Италиямен алмастыруды ұсынды

АҚШ президенті Дональд Трамптың арнайы өкілі Паоло Замполли Халықаралық футбол федерациясына (ФИФА) алдағы әлем чемпионатында Иран құрамасының орнына Италияны қосу мүмкіндігін қарастыруды ұсынды. Турнир АҚШ, Канада және Мексикада өтеді, деп жазады Financial Times.

— Мен Дональд Трампқа және ФИФА президенті Джанни Инфантиноға Италия құрамасын әлем чемпионатына қосу туралы ұсыныс жасадым, — деді Замполли.

Оның айтуынша, төрт дүркін әлем чемпионы Италия құрамасын АҚШ-та өтетін турнирде көру өзі үшін «арман» болып табылады.

— Мен италиялықпын, сондықтан Италия құрамасының АҚШ-та өтетін чемпионатқа қатысқанын қалаймын. Төрт чемпиондық атақ — турнирге лайық екенін дәлелдейтін жеткілікті тәжірибе, — деді ол.

Басылымның мәліметінше, бұл ұсыныс Трамп пен Италия премьер-министрі Джорджа Мелони арасындағы қарым-қатынасты жақсартуға бағытталған қадам болуы мүмкін. Бұған дейін Мелони АҚШ президентінің Иранға қарсы соғысқа байланысты Рим Папасы Лев XIV-ке айтқан сындарын қолдамағаны үшін екі тарап арасында келіспеушілік туған.

Би-би-си агенттігінің ФИФА-дағы дереккөздерге сілтеме жасап хабарлауынша, ұйым қазіргі таңда Иранды Италиямен алмастыру жоспарын қарастырып отырған жоқ. ФИФА ресми түрде пікір білдірмегенімен, ұйым президенті Джанни Инфантино бұған дейін «Иран құрамасы міндетті түрде қатысады» деп мәлімдеген.

Айта кетейік, Италия құрамасы іріктеу кезеңінен өте алмай, Босния және Герцеговина құрамасынан жеңіліп, қатарынан үшінші рет әлем чемпионатына қатыспай қалды.

Иран құрамасының турнирге қатысуы АҚШ пен Израильмен соғысқа байланысты күмән тудырғанымен, Тегеран командасының чемпионатқа дайындалып жатқанын және белгіленген кесте бойынша өнер көрсетуге ниетті екенін мәлімдеді.

Бұған дейін Иран футбол федерациясының президенті Мехди Тадж ФИФА-мен матчтарды АҚШ-тан Мексикаға көшіру мәселесін талқылап жатқанын айтқан. Ал Мексика президенті Клаудия Шейнбаум Иран құрамасының ойындарын өз елінде өткізуге дайын екенін білдірген.

Италияда бұл ұсыныс сынға ұшырады. Елдің спорт министрі Андреа Абоди турнирге қатысу спорттық нәтижелермен анықталатынын айтып, мұндай бастамаларды орынсыз деп бағалады.

ФИФА ережелеріне сәйкес, команда құрамын өзгерту туралы шешімді тек ұйымның өзі қабылдайды.  

Әлем чемпионаты 11 маусымда басталады. Иран құрамасы топтық кезеңде Жаңа Зеландия, Бельгия және Мысыр құрамаларымен кездесуі тиіс.

Осыған дейін FIFA биылғы ӘЧ матчтары билеттерінің жаңа партиясын сатылымға шығарғаны туралы жаздық.