Хезболла Ливанда француз бітімгерінің өліміне қатысы барын жоққа шығарды

Ұйым мәлімдемесінде Гандурийя аймағының Бинт-Джбейль округінде болған оқиғаға «Хезболланың ешқандай қатысы жоқ екені» атап өтілді. Топ сондай-ақ жағдай толық анықталмайынша, асығыс қорытынды жасап, айып тағудан сақ болуға шақырды.

«Хезболла» жергілікті тұрғындар, UNIFIL және Ливан армиясы арасындағы үйлестіруді жалғастырудың маңызын атап өтіп, аймақтағы жағдайды «шиеленісті» деп сипаттады. Сонымен қатар кейбір тараптардың алдын ала айып тағуын сынға алып, UNIFIL күштеріне жасалған өзге шабуылдар кезінде үнсіз қалғанын да еске салды.

Франция президенті Эммануэль Макронның X әлеуметтік желісінде жариялаған мәліметінше, шабуыл салдарынан 17-ші парашюттік инженерлік полкінің аға сержанты Флориан Монторио қаза тауып, үш әскери қызметші жараланған.

— Барлық дерек бұл шабуылға «Хезболланың» жауапты екенін көрсетеді, — деп қосты ол.

UNIFIL өкілдері өз позицияларының бейресми қарулы топтар тарапынан оққа ұшқанын хабарлап, оқиғаға қатысты тергеу басталғанын мәлімдеді.

Бұдан бұрын Израиль мен Ливан арасында 10 күнге атысты тоқтату туралы келісім жарияланған соң әлем елдерінің басшылары мен үкімет өкілдері бұл бастамаға қатысты пікір білдірді. Халықаралық қауымдастық бітімді құптап, тараптарды келісімді толық сақтауға және шиеленісті ушықтырмауға шақырды. Kazinform агенттігінің тілшісі негізгі мәлімдемелерге шолу жасады.