ІІМ көңіл көтеретін газдың заңсыз айналымына тосқауыл қойды

Polisia.kz хабарлауынша, биылғы 1 қаңтардан бастап Қылмыстық кодекстің 301-бабына сәйкес күшті әсер ететін заттардың заңсыз айналымы үшін қылмыстық жауапкершілік енгізілген. Бұл тізімге жастар арасында «көңіл көтеретін газ» деп аталатын азот оксиді де кірді.

ІІМ‑нің есірткі қылмысына қарсы іс-қимыл комитеті түнгі клубтар мен ойын-сауық орындарында рейдтер жүргізіп, тыйым салынған заттарды тарату фактілерін анықтауда. Жыл басынан бері республика бойынша 49 жағдай тіркеліп, 1,5 мыңнан астам баллон және екі автоцистерна тәркіленді. Көрші мемлекеттен жеткізу арнасы да жабылды. Барлық дерек бойынша қылмыстық істер қозғалды.

Сот үкімі заңды күшіне еніп, кінәлі адам сегіз жылға бас бостандығынан айырылды. Комитет басшысы Бақытжан Әмірханов азаматтарды, әсіресе ойын-сауық орындарының иелері мен әкімшілерін азот оксидін таратуға жол бермеуге шақырды. Оның айтуынша, тыйым салынған заттарды тасымалдауға, сақтауға және өткізуге қатысы бар адамдардың барлығы жауапкершілікке тартылады, ал заң бұзушыларға қатысты жазаның бұлтартпастығы қағидаты әрдайым сақталады.

Бүгін, 12:52